اۋعانستاننىڭ كانداگار پروۆينتسياسىنىڭ سپين-بولداك اۋدانىندا بەلگىسىز ادامدار جۇزدەن استام بەيبىت تۇرعىندى ولتىرگەن دەپ حابارلايدى "ادىرنا" ۇلتتىق پورتالى "Tolo News" تەلەارناسىنا سىلتەمە جاساپ.
بۇل تۋرالى اۋعانستاننىڭ ىشكى ىستەر مينيسترلىگى ء(ىىد) مالىمدەگەن.
"پەندجابتان (پاكىستان) كەلگەن باسشىلارىنىڭ بۇيرىعىمەن قاتىگەز تەرروريستەر سپين-بولداكتىڭ ءبىر بولىگىندەگى جازىقسىز اۋعاندىقتاردىڭ ۇيلەرىنە شابۋىل جاساپ، ۇيلەردى توناپ، جۇزدەگەن جازىقسىز ادامداردى ءولتىردى", - دەدى ىشكى ىستەر مينيسترلىگىنىڭ وكىلى ميرۆايس ستانەكزاي.
اۋعانستان ۇكىمەتى بۇل وقيعاعا اۋدانداعى بيلىكتى باسىپ العان راديكالدى «تاليبان» قوزعالىسىنىڭ (رەسەيدە بۇلارعا تىيىم سالىنعان) سودىرلارىن كىنالاپ وتىر.
اۋعانستان قورعانىس مينيسترلىگىنىڭ وكىلى روحۋللا احمادزايدىڭ ايتۋىنشا، تالىبتەر بىرنەشە رەت جەرگىلىكتى تۇرعىندار مەن مەملەكەتتىك مەكەمەلەردىڭ ۇيلەرىن توناپ، قالا ينفراقۇرىلىمىن قيراتىپ، بەيبىت تۇرعىنداردى ولتىرگەن.
ال «تاليبان» ۇيىمىنىڭ وكىلى زابيۋللا مۋدجاحەد ۇكىمەتتىڭ بۇل قوزعالىسقا بايلانىستى وزدەرىنە تاققان ايىبىن جوققا شىعاردى.
اۋعانستانداعى جاعداي اقش پەن ناتو ەلدەرى 1 مامىردا اسكەري كونتينگەنتىن رەسمي تۇردە شىعارۋدى باستاعاننان كەيىن ۋشىعىپ كەتتى. ەلدە «تاليبان» كۇشتەرى كۇشەيە ءتۇستى، سودىرلار اۋدانداردى باسىپ الا باستادى.
مۋدجاحەد بۇل قوزعالىس اۋعانستان شەكارالارىنىڭ 90 پايىزىن باسىپ العانىن جانە ۇستاپ وتىرعانىن مالىمدەدى. بۇگىندە بۇل ەلمەن شەكتەسكەن يران، تۇرىكمەنستان، تاجىكستان جانە وزبەكستان شەكارالارى تولىق باقىلاۋعا الىنعان.
"ادىرنا" ۇلتتىق پورتالى.
