جەڭىل اتلەتشى ولگا رىپاكوۆا توكيوداعى وليمپيادا ويىندارىنىڭ اشىلۋىندا قازاقستاندىق دەلەگاتسيانى تانىستىرۋشى بولدى. قازاقتىڭ ۇلتتىق كيىمىن كيگەن سپورتشىعا جاپوندىقتار تاڭدانىپ، Twitter جەلىسىندە ءار ءتۇرلى پىكىرلەر قالدىرعان دەپ حابارلايدى "ادىرنا" ۇلتتىق پورتالى "Tengrinews.kz-كە" سىلتەمە جاساپ.
Nikkansports.com سايتىنىڭ حابارلاۋىنشا، الەۋمەتتىك جەلىلەردەگى تۇرعىندار ولگا رىپاكوۆانى ءيميدجى مەن ويىنداعى فوندىق مۋزىكاسىنا بايلانىستى «ويىن حانشايىمى» دەپ اتاپتى (توكيو وليمپياداسىنىڭ اشىلۋى Final Fantasy ترەگىمەن جانە باسقا جاپوندىق كومپيۋتەرلىك ويىندارمەن ءوتتى).
Vesti.kz سايتى اتاپ وتكەندەي، وليمپياداعا كوستيۋمدەر دايىنداۋ جانە ۇلتتىق ويۋ-ورنەكتەردىڭ سيمۆوليكاسى مەن ولاردى پايدالانۋدا قازاقستان ۇلتتىق قۇراماسى ءابىلحان قاستەەۆ اتىنداعى مەملەكەتتىك ونەر مۋزەيىنىڭ ساندىك-قولدانبالى ونەر زەرتتەۋشىلەرىنەن كەڭەس العان.
«كوستيۋمدەر بىرەگەي، زاماناۋي جانە ءداستۇرلى. بۇل شەبەرلەر جاساعان جوعارى ءساندى بۇيىمدار، مەن ولارعا كەرەمەت جۇمىستارى ءۇشىن العىس ايتۋىم كەرەك»، - دەگەن بولاتىن بۇعان دەيىن ولگا رىپاكوۆا olympic.kz-كە بەرگەن پىكىرىندە.
ايتا كەتۋ كەرەك، ولگا رىپاكوۆا - ۇزىندىققا، قارعىپ سەكىرۋگە ماماندانعان قازاقستاندىق سپورتشى. ول لوندوندا وتكەن وليمپيادانىڭ چەمپيونى (2012), پەكين وليمپياداسىنىڭ كۇمىس جۇلدەگەرى (2008) جانە ريو-دە-جانەيرو وليمپياداسىنىڭ قولا جۇلدەگەرى (2016). سوناي-اق ول جابىق عيماراتتا ءۇش مارتە سەكىرۋ بويىنشا الەم چەمپيونى.
"ادىرنا" ۇلتتىق پورتالى.
