بۇل تۋرالى قوعامدىق سانانى جاڭعىرتۋ باعدارلاماسىن اتىراۋ وبلىسىندا ىسكە اسىرۋ جونىندەگى وڭىرلىك كوميسسيا وتىرىسىندا كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانىش مامبەتوۆ باياندادى.
جيىنعا توراعالىق ەتكەن ايماق باسشىسى ماحامبەت دوسمۇحامبەتوۆ قوعامدىق سانانى جاڭعىرتۋدىڭ ماڭىزدىلىعىن اتاپ ءوتتى.
«جالپى، ۇلتتىڭ جاڭعىرۋى ءاربىرىمىزدىڭ ۇلتقا دەگەن قىزمەتىمىزدەن، سانا-سەزىمىمىزدەن كورىنىس تابادى. ەلگە قىزمەت ەتۋ - قۋانىش، ەلگە سىي كورسەتۋ - ءسۇيىنىش. ءبىزدىڭ ءاربىر ءىسىمىز تالعامعا، مەنتاليتەتكە ساي بولعانى – ەرەكشە كوڭىل اۋدارار تۇس. سوندىقتان، رۋحاني جاڭعىرۋ قاي كەزەڭدە دە كەرەك ەتىلەتىن قۇبىلىس»،-دەدى ول.
ىشكى ءتۋريزمدى دامىتۋعا قاتىستى پىكىر بىلدىرگەن كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانىش مامبەتوۆتىڭ سوزىنشە، 2021-2025 جىلدارى جاڭا تۋريستىك نىساندار سالىنىپ، 338 جاڭا جۇمىس ورنى اشىلادى. «ىشكى تۋريزم بويىنشا كەلۋشىلەر سانى جىلىنا 33,7 مىڭنان 79,4 مىڭ ادامعا ارتىپ، 100 ملن.تەڭگەدەن استام بيۋدجەتكە سالىقتىڭ تۇسۋىنە ۇلكەن مۇمكىندىك بەرەدى»،- دەدى ول.
سونداي-اق، ق.مامبەتوۆتىڭ ايتۋىنشا، الداعى ۋاقىتتا بالالار جانە جاسوسپىرىمدەر ءتۋريزمىن دامىتۋ بويىنشا «جاندى ساباقتار» جوباسىن جۇزەگە اسىرۋ كوزدەلىپ وتىر. جوبا اياسىندا اتىراۋ قالاسىنىڭ مەكتەپ وقۋشىلارىنا «ەمبىمۇنايگاز» اق جانە ن.بالعىمباەۆ اتىنداعى ينتەراكتيۆتى مۇراجايلارىنا ەكسكۋرسيالار ۇيىمداستىرىلادى. وعان قوسا، وبلىستىڭ شالعاي اۋىلدارىنداعى از قامتىلعان وتباسىلاردىڭ بالالارىنا مادەني-تانىمدىق نىساندارعا ەكسكۋرسيا جانە وتاندىق تۋروپەراتورلارعا اقپاراتتىق تۋرلار ۇيىمداستىرۋ جوسپارلانۋدا.
ال، ءبىلىم بەرۋ باسقارماسى باسشىسىنىڭ مىندەتىن اتقارۋشى ا.دۇيسەكەنوۆا ءبىلىم بەرۋدىڭ بارلىق دەڭگەيىندە قوعامدىق سانانى جاڭعىرتۋ، بالالاردىڭ بويىندا ۇلتتىق قۇندىلىقتاردى قالىپتاستىرۋ باعىتىندا اتقارىلعان جۇمىستارعا توقتالدى. قۇرمانعازى مەن قىزىلقوعا اۋدانى اكىمدەرى ءوز اۋماقتارى بويىنشا بۇل باعىتتاعى جاسالىپ جاتقان جۇمىستاردى باياندادى.
جيىن سوڭىندا ءوڭىر باسشىسى ماحامبەت دوسمۇحامبەتوۆ «رۋحانياتقا قىزمەت – ەلگە قىزمەت. تاۋەلسىزدىكتىڭ 30 جىلدىعى اياسىندا وتكىزىلەتىن ءىس-شارالاردىڭ ءتيىستى دەڭگەيدە ۇيىمداستىرىلۋىن تاپسىرامىن. ۇزدىك جوبالار جوسپارلانىپ، جۇزەگە اسىرىلۋى قاجەت. بۇل «رۋحاني جاڭعىرۋ» باعدارلاماسىنىڭ وبلىستا تالاپقا ساي ىسكە اسىرىلۋىنا وڭ ىقپال ەتەدى»،-دەدى وبلىس باسشىسى.
