اتىراۋدا 12 ملن تەڭگە ايىپپۇلى تولەنبەگەن كولىكپەن جۇرگەن ايەل ۇستالدى دەپ حابارلايدى "ادىرنا" ۇلتتىق پورتالى "قازاقپاراتقا" سىلتەمە جاساپ.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، پاترۋلدىك پوليتسيا قىزمەتكەرلەرى مەن جەكە سوت ورىنداۋشىلار پالاتاسىنىڭ جەكە سوت ورىنداۋشىلارىنىڭ بىرلەسكەن رەيدتىك ءىس-شاراسىندا تولەنبەگەن ايىپپۇلى بار 30-دان استام اۆتوكولىكتىڭ يەسى انىقتالعان.
«بۇل اۆتوكولىكتەردىڭ يەلەرى جىلدامدىقتى اسىرۋ، جول بەلگىسى تالاپتارىن ورىنداماۋ، باعدارشامنىڭ تىيىم سالىنعان تۇسىنەن ءوتۋ قاعيدالارىن بۇزعانى ءۇشىن «سەرگەك» كامەرالارىنا تۇسكەن. پاترۋلدىك پوليتسيا قىزمەتكەرلەرى اباي كوشەسى مەن ازاتتىق داڭعىلىنىڭ قيىلىسىندا «Toyota Camry» اۆتوكولىگىن توقتاتتى. تەكسەرۋ كەزىندە 41 جاستاعى ايەلدىڭ باسقارۋىنداعى كولىك يەسىنىڭ 12 ميلليوننان استام تەڭگەنى قۇراعان ايىپپۇلى بارى انىقتالدى. جەكە سوت ورىنداۋشىسىنىڭ كولىك قۇرالىن ۇستاۋ تۋرالى قاۋلىسىمەن اۆتوكولىك ارناۋلى تۇراققا قويىلدى» - دەيدى وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى قامزا ۇمبەتقاليەۆ.
ەسكە سالا كەتەلىك، بۇعان دەيىن اتىراۋدا ءبىر اپتادا ايىپپۇلى تولەنبەگەن 42 كولىك تۇراققا قويىلعان بولاتىن.
"ادىرنا" ۇلتتىق پورتالى.
