شىمكەنت قالاسىندا مەملەكەتتىك ءبىلىم بەرۋ باعدارلاماسى تابىستى جۇزەگە اسىپ جاتىر. بيىلعى جاڭا وقۋ جىلىندا قالادا 20 جاڭا مەكتەپ اشىلىپ، 2 مەكتەپتىڭ قوسىمشا كورپۋسى اياقتالىپ، اپاتتى مەكتەپتەر جويىلىپ، ءۇش اۋىسىمدى مەكتەپ سانى 14-تەن 9 مەكتەپكە ازايدى. جىل سوڭىنا دەيىن تاعى 4 جاڭا مەكتەپ اشىلادى.
«مەملەكەت باسشىسىنىڭ تاپسىرماسى اياسىندا شىمكەنت قالاسىندا ءبىلىم بەرۋ ينفراقۇرىلىمى قارقىندى دامىپ كەلەدى، – دەدى قالا اكىمى مۇرات ايتەنوۆ «تۇران» شاعىن اۋدانىندا سالىنعان جاڭا مەكتەپپەن تانىسۋ بارىسىندا.
– بيىلعى جاڭا وقۋ جىلى تاۋەلسىزدىگىمىزدىڭ 30 جىلدىق مەرەيتويى قارساڭىندا باستالعالى وتىر. تاۋەلسىزدىك جىلدارىندا شىمكەنت قالاسىنىڭ ءبىلىم سالاسى ۇلكەن جەتىستىكتەرگە جەتتى. وسىدان وتىز جىل بۇرىن قالادا 69 مىڭ وقۋشىسى بار 72 مەكتەپ بولسا، قازىر 233 مىڭنان اسا وقۋشى وقيتىن 203 مەكتەپ بار. بيىلعى جاڭا وقۋ جىلىن قالا مەكتەپتەرى 233 879 وقۋشىمەن باستادى. وتكەن جىلمەن سالىستىرعاندا 8 مىڭ وقۋشىعا كوپ. ونىڭ ىشىندە 25 مىڭ وقۋشى العاش رەت مەكتەپ تابالدىرىعىن اتتاپ وتىر. 2025 جىلعا دەيىن 72 مەكتەپ سالۋ جوسپارلانعان بولاتىن. سونىڭ ىشىندە 24 مەكتەپ بيىل قاراستىرىلعان، ونىڭ 20-سى وقۋ جىلىنىڭ باسىندا اشىلىپ وتىر. سونىمەن بىرگە 2 مەكتەپكە قوسىمشا كورپۋس سالىندى. جىل سوڭىنا دەيىن تاعى 4 مەكتەپ اياقتالۋعا ءتيىس. بيىلعى جاڭا وقۋ جىلىن اپاتتى مەكتەپسىز باستاپ وتىرمىز. 2023 جىلعا دەيىن قالادا ءۇش اۋىسىمدى مەكتەپ ماسەلەسى تولىق شەشىلەدى»، – دەدى اكىم ءوز قۇتتىقتاۋ سوزىندە.
بارشا ۇستازدار مەن شاكىرتتەردى ءبىلىم كۇنىمەن جانە جاڭا مەكتەپتىڭ اشىلۋىمەن قۇتتىقتاعان قالا باسشىسى مەكتەپ تابالدىرىعىن العاش رەت اتتاپ وتىرعان ءبىرىنشى سىنىپتىڭ بۇلدىرشىندەرىنە ساتتىلىك تىلەپ، ولارعا الىپپە تابىستادى.
اكىم بالالاردىڭ قاۋىپسىزدىگىن قامتاماسىز ەتۋ ءۇشىن مەكتەپتەر ۆيدەو باقىلاۋ جۇيسىمەن جابدىقتالىپ، تۋرنيكەتتەر قويىلىپ، دابىل باتىرمالارى ورناتىلعانىن، مەكتەپتەردىڭ ماتەريالدىق-تەحنيكالىق بازاسىن نىعايتۋ بويىنشا جۇمىستار جۇيەلى تۇردە جۇرگىزىلىپ كەلەتىنىن ايتتى. سونىمەن بىرگە جاڭا موديفيكاتسيالانعان جابدىقتارمەن قامتاماسىز ەتۋ ماقساتىندا 263 كابينەت، 178 ينتەراكتيۆتى تاقتا ورناتۋ جۇمىستارى جۇرگىزىلدى. ناتيجەسىندە، جاڭا موديفيكاتسيالانعان جابدىقتارمەن قامتىلعان ءپان كابينەتتەر ۇلەسى 32,5%-دان 65%-عا جەتتى. بۇل جۇمىستار جالعاسىن تاباتىن بولادى.
قالا اكىمى 1200 ورىندىق وقۋ كەشەنىن ارداگەرلەرمەن بىرگە ارالادى. اباي سىنىبى، STEM-كابينەتى، شاحمات بۇرىشى، ەڭبەك شەربەرحانالارىمەن تانىستى. قۇرىلىستىڭ ساپاسى مەن ديزاينىنا ءمان بەرگەن مۇرات ايتەنوۆ جاڭا مەكتەپكە وڭ باعاسىن بەرىپ، مەكتەپ ديرەكتورىنا سانيتارلىق شارالاردىڭ ساقتالۋىن قامتاماسىز ەتۋدى تاپسىردى.
ايتا كەتەيىك، پاندەمياعا بايلانىستى العاشقى قوڭىراۋ ءبىلىم تابالدىرىعىن العاش اتتاعان بۇلدىرشىندەر ءۇشىن عانا مەكتەپ اۋلاسىندا سالتاناتتى جيىن ءوتتى، قالعان سىنىپ وقۋشىلارىنا سانيتارلىق تالاپتاردى ساقتاي وتىرىپ سىنىپ ساعاتى ۇيىمداستىرىلدى.
شىمكەنت قالاسى اكىمدىگىنىڭ ءباسپاسوز قىزمەتى
