ۆاكتسينا الدىپ پا ەدىڭ؟
- جوق. ۆاكتسيناعا سەنبەيمىن، باۋىرىم! ول ادامنىڭ سانىن ازايتۋعا ارنالعان.
- قالاي؟
- جەر بەتىندە 1 ميلليارد قانا قالۋ كەرەك. سول ءۇشىن ءبارى. ماسونداردىڭ تىرلىگى عوي.
- ماسوندار دەگەنىڭ كىم؟ نازارباەۆ پا، توقاەۆ پا؟
- وي، ولار دا پەشكا عوي. ءبىز ولاردى كورمەيمىز، بىلمەيمىز. ەكى جىلدان سوڭ ۆاكتسينا العاندار ولەدى.
- نازارباەۆ تا، توقاەۆ تا الدى عوي.
- ولاردىكى وتىرىك. جانىندا تۇرىپ پا ەدىڭ؟
- جوق. نازارباەۆتىڭ العانىن سۋرەتتەن كوردىك قوي.
- حەح. پوستانوۆكا عوي ءبارى.
- مىسالى مەن سەگىز اعايىندىمىن. سوندا كەيىن سونىڭ بىرەۋى عانا قالا ما؟
- پولۋچاەتسيا، سولاي.
- ءوزىڭ قانشاسىڭ؟
- تورتەۋمىز. ەشكىم المادىق.
- سەنە المايمىن. ءوزىم ءبىرىنشى دوزاسىن الدىم. ەشتەڭە بولعان جوق.
- ءوزىڭ ويلاشى... ءبىر جىلدا پاندەميا دەپ دۇنيەنى استاڭ-كەستەڭ قىلدى. بۇل كىمگە پايدالى؟
- ەشكىمگە. قانشاما ەلدىڭ ەكونوميكاسى قۇلدىرادى. كومپانيالار اقشادان ايىرىلدى. سول ميللياردەرلەر، سول ەلدىڭ باسشىلارى، قاۋىپسىزدىك قىزمەتكەرلەرى، تاۋەلسىز جۋرناليستەرى مەن عالىمدارى، زەرتتەۋ ورتالىقتارى تۇگەل سۋايت پا؟
- سۋايت-مۋايت، بىلمەيمىن. بىراق مىنا جەر شارىنا ادام سىيماي بارا جاتىر. ۆوت. سول ءۇشىن ازايتۋ كەرەك. "زولوتوي ميلليارد" ءۇشىن ءبارى.
- ەكى جىلدان سوڭ ءبىتتىم بە سوندا؟
- قۇداي بىلەدى.
اڭگىمە وسى تۇسقا كەلگەندە ۇندەمەي قالدىم. الماتى-تالدىقورعان تراسساسىندا جۇيتكىپ بارا جاتقان كولىك ىشىنەن تەرەزەگە ءۇنسىز قاراپ وتىرا بەردىم. سالوندا شۋلاپ وتىرعان بالا-شاعام دا ماۋجىراپ كەتىپتى...
نۇربەك ءتۇسىپحان،
"ادىرنا" ۇلتتىق پورتالى
