قىزىلوردا وبلىسى جالاعاش اۋداندىق ءبىلىم بەرۋ ءبولىمى تاراتقان رەسمي حات ەلدى دۇرلىكتىردى. وندا 12 جاستان اسقان بالالارعا كوروناۆيرۋسقا قارسى ۆاكتسينا سالۋ تۋرالى ايتىلعان. ءتىپتى وقۋشىلاردىڭ ءتىزىمىن جاساۋعا تاپسىرما بەرىلگەن، دەپ حابارلايدى "ادىرنا" ۇلتتىق پورتالى sputnik.kz-گە سىلتەمە جاساپ.
ءبىلىم ءبولىمىنىڭ حاتى اتا-انالار چاتتارىندا جىلدام تاراپ كەتتى. حالىق بۇل باستامانى بالالاردى ءماجبۇرلى ۆاكتسينالاۋ دەپ قابىلدادى. وسىعان بايلانىستى نارازىلىق تا كۇشەيدى.
- اۋداندىق ءبىلىم ءبولىمى سانيتارلىق ەپيدەميولوگيالىق ورتالىعىنىڭ 07.09.2021 جىلعى №2216 ساندى حاتىنا سايكەس 12 جاستان اسقان بالالاردى كوروناۆيرۋس ينفەكتسياسىنا قارسى ۆاكتسينالاۋ جوسپارلانعاندىعىن حابارلايدى. وسىعان وراي سىزدەن ەكپە جۇمىستارىنا بايلانىستى تومەندەگى كەستەگە سايكەس تولىق مالىمەتتى وسى جىلدىڭ 9 قىركۇيەگىنە دەيىن ءبىلىم بولىمىنە جولداۋدى تاپسىرادى، - دەلىنگەن رەسمي حابارلامادا. وبلىستىق ءبىلىم باسقارماسى اۋداندىق ءبولىمنىڭ بۇل باستاماسىن توقتاتتى.
- ءبىزدىڭ زاڭنامامىزعا سايكەس، ەلىمىزدە 18 جاسقا دەيىنگى كەز كەلگەن ۆاكتسينالاۋ اتا-انالاردىڭ كەلىسىمىمەن عانا جۇرگىزىلەدى. وسىعان بايلانىستى ءبىلىم باسقارماسى جالاعاش اۋداندىق ءبىلىم ءبولىمىنىڭ 12 جاستان اسقان بالالاردىڭ ءتىزىمىن جاساۋعا قاتىستى باستاماسىن توقتاتتى. وبلىستا باسقا ءبىلىم بەرۋ ۇيىمدارىندا ونداي دەرەكتەر جينالىپ جاتقان جوق، - دەدى باسقارما باسشىسى اقزيرا قاسىموۆا ارنايى بريفينگتە. ال جالاعاش اۋداندىق ءبىلىم ءبولىمىنىڭ باسشىسىنا "تىم ەرتە قيمىلداعانى ءۇشىن" سوگىس جاريالاندى.
وبلىستىڭ سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ابدىكارىموۆانىڭ ايتۋىنشا، قازاقستاندا بالالار مەن جاسوسپىرىمدەردى كوروناۆيرۋس ينفەكتسياسىنا قارسى ۆاكتسينالاۋ بويىنشا ناقتى شەشىم قابىلدانعان جوق. وعان قوسا، ەلىمىزگە جۇكتى ايەلدەر مەن بالالارعا ەگۋگە بولاتىن Pfizer ۆاكتسيناسى ءالى جەتكىزىلمەدى - دەيدى ول.
"ادىرنا" ۇلتتىق پورتالى
