قازاقستاندا Facebook, Instagram, YouTube سياقتى تانىمال الەۋمەتتىك جەلىلەر بۇعاتتالۋى مۇمكىن، دەپ حابارلايدى "ادىرنا" ۇلتتىق پورتالى.
كەشە، 15 قىركۇيەكتە قر پارلامەنت ماجىلىسىنىڭ دەپۋتاتتارى بيلىككە وسىنداي قۇقىق بەرەتىن زاڭ جوباسىن ماقۇلدادى.
جاڭا قۇجاتقا سايكەس، شەتەلدىك ونلاين-پلاتفورمالار قازاقستان اۋماعىندا قىزمەتىن جۇزەگە اسىرۋ ءۇشىن مىندەتتى مەملەكەتتىك تىركەۋدەن ءوتۋى ءتيىس. زاڭ قولدانىسقا ەنگەن سوڭ التى اي ىشىندە تىركەلمەگەن ونلاين-پلاتفورمالاردىڭ "الەۋمەتتىك جەلى" قازاقستان اۋماعىنداعى قىزمەتى شەكتەلەدى.
بيلىككە الەۋمەتتىك جەلىلەردى بۇعاتتاۋ مۇمكىندىگى بالا قۇقىعىن قورعاۋ زاڭى اياسىندا بەرىلمەك. جوبانى تالقىعا سالعان دەپۋتاتتار "بۋللينگ" پەن "كيبەربۋللينگ" سوزدەرىن ءجيى قولدانىپ، ءوز پىكىرلەرىمەن ءبولىستى. بۇعان دەيىنگى ەسكى زاڭداردا الەۋمەتتىك جەلىلەردىڭ جاۋاپكەرشىلىگى جەتە قامتىلمادى دەگەن ءماجىلىس توراعاسى ەشكىمگە قاراماي، وسى زاڭدى جەدەل ىسكە اسىرۋدى تاپسىردى.
- سۋيتسيدكە اپاراتىن جول. سوندىقتان جاڭا ايتىپ كەتكەندەي، بالالاردىڭ، اسىرەسە مەكتەپ بالالارىنىڭ بۋللينگ جانە كيبەربۋللينگتەن تولىقتاي قورعايتىن ناقتى نورمالارىمىزدى ەشكىمگە قاراماي ەنگىزۋىمىز كەرەك. انالار ايتىپ جاتىر، مىنالار ايتىپ جاتىر... بۇل بالالاردىڭ بولاشاعى، بالالاردىڭ ءومىرى!، - دەيدى ن.نىعماتۋللين
بۇدان بولەك ەل اۋماعىنداعى فيليالدارىنا شەتەلدىكتەر مەن ازاماتتىعى جوق ادامدار باسشى بولا المايتىنى ءسوز ەتىلدى.
زاڭدى ۇسىنعان دەپۋتات ايدوس سارىمنىڭ مالىمدەۋىنشە، الەۋمەتتىك جەلىلەر قازاقستاندىق اۋديتوريانى پايدالانىپ، تابىس تاۋىپ وتىر. سوندىقتان قازاقستان زاڭىمەن دە ساناسۋى كەرەك.
- اتا-انالار، ءوزى ءبىر بەلسەندىلىك تانىتىپ زاڭسىز كونتەنتتى نەمەسە ادامداردىڭ ار-نامىسىن تاپتاعان بالالاردىڭ دەنساۋلىعىنا، پسيحيكاسىنا ت.ب. اسەر ەتەتىن جاعدايدا. ءبىزدىڭ اقپارات مينيسترلىگى وسىنداي ازاماتتاردان كەلگەن ارىز-تالاپتاردىڭ ءبارىن جيناپ، سول فەيسبۋكقا، ينستاگرام ت.ب. جىبەرەدى. بىراق، ولاردان ەشقانداي رەاكتسيا جوق. سوندىقتان جۇمىس توبىنىڭ وتىرىستارىندا وسىنداي ويعا كەلدىك. شىنىمەن دە، قازاقستاندا قازاق ءتىلىن بىلەتىن وكىلى وتىرۋى كەرەك - دەپ مالىمدەدى ءماجىلىس دەپۋتاتى.
ساراپشىلار زاڭ جوباسىنان ءسوز بوستاندىعىنا قاۋىپ كورىپ، مۇنى "الەۋمەتتىك جەلىنى" بيلىك قولىنا تاپسىرۋ دەپ باعالاپ وتىر.بالانىڭ كيبەربۋللينگ ماسەلەسى بويىنشا نەگىزى ەلىمىزدە باسقا دا زاڭدار تولىپ جاتىر. قازاقستاندا پىكىر ەركىندىگى بار جالعىز ورىن الەۋمەتتىك جەلى - دەگەن ولار بيلىك بالا قۇقىعى ءسوزىن العا تارتىپ، قۋلىق ىستەپ وتىر دەيدى.
"ادىرنا" ۇلتتىق پورتالى
