قازاققا قادىرلى قالىبەك اعامىز ومىردەن وتكەندە ريشات اسقاربەكۇلى ءوز پاراقشاسىندا جىپ-جىلى جازبا قالدىرىپ، عالامات سۋرەت جاريالادى. بۇل تەگەۋرىندى جۋرناليست قالىبەك اتجان مەن ونىڭ تەڭدەسسىز وپەراتورى اعابەك قازانبايدىڭ ەلوردا كوشەسىندە تۇسكەن سۋرەتى ەدى. كىم تۇسىرسە دە، قولىنا تالاي رەت فوتواپپارات ۇستاپ كورگەن كانىگى ماماننىڭ قولتاڭباسى ەكەنى انىق. ەكەۋىنىڭ توبە تۇسىنان ارىرەكتە ءبىزدىڭ قالانىڭ بايتەرەگى ايقىن كورىنىپ تۇر. بۇگىندە ۇلت جۋرناليستيكاسىنىڭ شىڭداعى شىنارىنا اينالعان ەكى اعامىزدىڭ قاتار تۇرعان كەيپى دە سونداي جاراسىمدى. تىلسىم سۋرەت... قوس مايتالمان... بالكىم، كەزدەسۋ... بالكىم، قوشتاسۋ... ءۇش بايتەرەك... ەكەۋىنىڭ بۇدان باسقا بىرگە تۇسكەن سۋرەتى بار ما ەكەن، ءوزى؟
ريشات ءىنىمنىڭ وسى جازباسى «برەندكە اينالعان ءبىر اۋىز ءسوز» دەگەن ماقالامىزدى، دالىرەك ايتقاندا، وسىدان ون-ون بەس جىل بۇرىن جاريالانعان وي-پىكىرىمىزدى وڭدەپ-جوندەپ، قايتا جاڭعىرتۋىمىزعا تۇرتكى بولدى. سول ماقالامىزدىڭ سوڭىندا قالەكەڭنىڭ تۋىستارىنا، سونداي-اق قوس ءدۇلدۇلدىڭ سىڭارى، ارداقتى اعەكەمە دە كوڭىل ايتقانبىز.
ەرتەڭىنە كوڭىلى جۇدەۋ، داۋىسى باسەڭ اعابەك قازانباي اعام حابارلاستى. «جىگىتتەر سۋرەتتى قايدان تاپقان دەسەيشى، مەندە دە ساقتالماپتى، ءتىپتى قاشان تۇسكەنىم دە ناقتى ەسىمدە جوق-اۋ» دەيدى. ءسويتىپ، ريشات باۋىرىمىز قازاق جۋرناليستيكاسىندا قولتاڭباسى قالعان ەلەۋلى ەكەۋدىڭ تاريحي بەينەسىن قاتارعا قوستى.
بۇگىن قادىرلى ءىنىمىز، الەۋەتتى ارىپتەسىمىز
ورالحان ءداۋىتتىڭ پاراقشاسىنان وقىدىم، قالەكەڭنىڭ قىرىق كۇندىگىنە وراي اس بەرىلىپتى. ەلوردادان اعابەك قازانباي ارنايى كەلىپتى. رۋحى شات بولسىن قالىبەك اعامىزدىڭ!
اتجانىنان ايىرىلسا دا، ات-جالىنان ايىرىلماعان اعابەك قازانباي اعام، ەندى ءسىز امان بولىڭىز، ساۋ ءجۇرىڭىز!
"قالىبەك اتجان، اعابەك قازانباي..."
(سۋرەت ريشات اسقاربەكۇلىنىڭ پاراقشاسىنان الىندى).
باۋىرجان ومارۇلى
