Qazaqqa qadırlı Qalybek aǧamyz ömırden ötkende Rişat Asqarbekūly öz paraqşasynda jyp-jyly jazba qaldyryp, ǧalamat suret jariialady. Būl tegeurındı jurnalist Qalybek Atjan men onyŋ teŋdessız operatory Aǧabek Qazanbaidyŋ elorda köşesınde tüsken suretı edı. Kım tüsırse de, qolyna talai ret fotoapparat ūstap körgen känıgı mamannyŋ qoltaŋbasy ekenı anyq. Ekeuınıŋ töbe tūsynan ärırekte bızdıŋ qalanyŋ bäiteregı aiqyn körınıp tūr. Bügınde ūlt jurnalistikasynyŋ şyŋdaǧy şynaryna ainalǧan ekı aǧamyzdyŋ qatar tūrǧan keipı de sondai jarasymdy. Tylsym suret... Qos maitalman... Bälkım, kezdesu... Bälkım, qoştasu... Üş bäiterek... Ekeuınıŋ būdan basqa bırge tüsken suretı bar ma eken, özı?
Rişat ınımnıŋ osy jazbasy «Brendke ainalǧan bır auyz söz» degen maqalamyzdy, dälırek aitqanda, osydan on-on bes jyl būryn jariialanǧan oi-pıkırımızdı öŋdep-jöndep, qaita jaŋǧyrtuymyzǧa türtkı boldy. Sol maqalamyzdyŋ soŋynda Qalekeŋnıŋ tuystaryna, sondai-aq qos düldüldıŋ syŋary, ardaqty Aǧekeme de köŋıl aitqanbyz.
Erteŋıne köŋılı jüdeu, dauysy bäseŋ Aǧabek Qazanbai aǧam habarlasty. «Jıgıtter surettı qaidan tapqan deseişı, mende de saqtalmapty, tıptı qaşan tüskenım de naqty esımde joq-au» deidı. Söitıp, Rişat bauyrymyz qazaq jurnalistikasynda qoltaŋbasy qalǧan eleulı ekeudıŋ tarihi beinesın qatarǧa qosty.
Bügın qadırlı ınımız, äleuettı ärıptesımız
Oralhan Däuıttıŋ paraqşasynan oqydym, Qalekeŋnıŋ qyryq kündıgıne orai as berılıptı. Elordadan Aǧabek Qazanbai arnaiy kelıptı. Ruhy şat bolsyn Qalybek aǧamyzdyŋ!
Atjanynan aiyrylsa da, at-jalynan aiyrylmaǧan Aǧabek Qazanbai aǧam, endı sız aman bolyŋyz, sau jürıŋız!
"Qalybek Atjan, Aǧabek Qazanbai..."
(Suret Rişat Asqarbekūlynyŋ paraqşasynan alyndy).
Bauyrjan OMARŪLY
