بەس بىردەي ادامدى اتىپ تاستاعان يگور دۋجنوۆ 10 كومپانيا مەن جەكە تۇلعالارعا دا قارىز بولىپ شىقتى، دەپ حابارلايدى «ادىرنا» ءتىلشىسى «كتك» ارناسىنا سىلتەمە جاساپ.
بۇرىنعى وتباسىلىق دوسىنىڭ ايتۋىنشا، دۋجنوۆ ودان 35 مىڭ ەۋرو الىپ، ون جىلدان بەرى بەرمەي زار قاقساتىپ كەلەدى. ەندى ءبىرى قولحاتپەن بەرگەن 200 مىڭ دوللارىمدى قايتارمادى دەپ الەۋمەتتىك جەلىدە شۋ كوتەردى. ءتىپتى بەرەشەكتى قايتارماۋدىڭ امالى رەتىندە ودان ەكى جىلداي حابار-وشار بولماعان. سويتسە يگور دۋجنوۆ وسى ۋاقىتتا دونباسستاعى سوعىسقا بارىپ كەلدىم دەپ، جورا-جولداستارىنا ماقتانىشپەن ايتىپ ءجۇرىپتى. ەگەر قاسكويدىڭ بۇل ءسوزى راس بولسا، وندا ول سەپاراتيزم بابى بويىنشا دا جاۋاپقا تارتىلۋى مۇمكىن.
يگور دۋجنوۆتىڭ وتباسىمەن جۋرناليست ەلەنا ۆينوكۋروۆا ۇزاق جىلدار بويى ارالاسقان ەكەن. بىراق اۋلەتتەر اراسىنداعى جاقسى قارىم-قاتىناستى قىرۋار اقشا بۇزىپتى. ياعني يگور دۋجنوۆ ارىپتەسىمىزدىڭ اناسىنان ون جىل بۇرىن 35 مىڭ ەۋرو قولحاتپەن قارىز العان. بىراق بۇل بەرەشەكتى ۆينوكۋروۆا ءالى كۇنگە دەيىن ءوندىرىپ الا الماي جۇرگەنىن جەتكىزدى.
ال جۋرناليست دياس نۇراقىن facebook جەلىسىندەگى پاراقشاسىندا جاڭا دەرەكتەرمەن ءبولىستى.
“اقبۇلاقتا 5 ادامدى جايراتىپ تاستاعان "مەرگەننىڭ" بىزگە بەيمالىم سۋرەتى جاريالاندى. يگور دۋجنوۆ دونباستاعى سوعىسقا قاتىستى دەگەن قاۋەسەت شىعىپ ەدى. سول ءسوز راس سياقتى. وڭ جاقتان ساناعاندا ءبىرىنشى تۇرعان ازامات دۋجنوۆقا قاتتى ۇقسايدى. رەسەيلىك ارنايى قىزمەت ونىڭ ۋكراينادا سوعىستا بولعانىن، رازۆەدگرۋپپادا قىزمەت ەتكەنىن انىقتاپتى-مىس. كارابينىن قۇشاقتاپ 2 جىل جوعالىپ كەتتى دەپ جاتىر ەدى»،– دەپ جازدى ول.
يگور دۋجنوۆ قازىر قاماۋدا وتىر. ول اپتا باسىندا ءۇيىن بوساتۋدى تالاپ ەتكەن سوت ورىنداۋشى، ەكى ۋچاسكەلىك پوليتسيا قىزمەتكەرى مەن تاعى ەكى ادامدى اڭشى مىلتىعىمەن اۋلاسىندا جايراتىپ سالدى. قاندى وقيعاعا قاتىستى ەكى قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.
«ادىرنا» ۇلتتىق پورتالى
