ماماندار بۇعان پرەزيدەنت نۇرسۇلتان نازارباەۆتىڭ اقش-قا ساپارىنىڭ اسەرى دە جوق ەمەس دەگەن ويدا.
سونداي-اق، باررەلى ءۇشىن 70 دوللارعا جاقىنداعان مۇناي باعاسىنىڭ دا ىقپالى بار. وعان قوسا نەگىزگى ارىپتەسىمىز رەسەي ءرۋبلىنىڭ دوللارعا شاققانداعى باعامى كۇشەيىپ بارا جاتىر، دەيدى ساراپشىلار.
"ەگەر وسىنداي بىزگە قولايلى وسۋلەر بولا بەرسە، تەڭگەمىز بۇدان دا كۇشەيۋى مۇمكىن. مۇمكىن، 310-عا دەيىن ءتۇسۋى مۇمكىن", - دەيدى ەكونوميست ساپارباي جوباەۆ.
ال رەسەيلىك ساراپشىلاردىڭ بولجامىنشا جىل سوڭىنا دەيىن تەڭگە باعامى 315-318 تەڭگەگە دەيىن نىعايۋى مۇمكىن.
"اقپان ايىنىڭ سوڭىنا باعام 322-گە جەتەدى دەپ بولجاعانبىز. الايدا باعام ءبىزدىڭ بولجامىمىزدان بۇرىن كەلىپ جاتىر. ال جىل سوڭىنا دەگەن بولجام 315-318 دالىزىندە بولماق. جارتى نەمەسە ءبىر جىلعا دەپوزيتتەر اشىپ، جىل سوڭىندا نەمەسە كەلەسى جىلدىڭ باسىندا باسپانا ساتىپ الۋدى جوسپارلاسا، ءتيىمدى بولادى", - دەيدى TeleTrade كومپانيالار توبىنىڭ باس ساراپشىسى پەتر پۋشكارەۆ.
ايتا كەتەيىك، ۇلتتىق بانك تەڭگەنىڭ رەسمي باعامىن 324, 65 دەپ بەرسە، ۆاليۋتا ايىرباستاۋ ورتالىقتارى ءبىر دوللاردى 322 تەڭگەدەن ساتىپ الىپ، 323 تەڭگەگە ساۋدالاپ جاتىر.
استانا تەلەارناسى
