قوعامدىق دەنساۋلىق ساقتاۋ ۇلتتىق ورتالىعىنىڭ «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالى ديرەكتورىنىڭ ورىنباسارى مانار سماعۇل جاسوسپىرىمدەر مەن دۇكتى ايەلدەردى COVID-19-عا قارسى ۆاكتسينالاۋ تۋرالى پىكىر ءبىلدىردى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
«دامىعان ەلدەردىڭ ءبارى جاسوسپىرىمدەر مەن جۇكتى ايەلدەرگە وسى ۆاكتسينانى سالىپ جاتىر. اقش پەن ۇلىبريتانيادا اتالعان توپتاردى ۆاكتسينالاۋ تاجىريبەسى بار. ياعني، Pfizer ۆاكتسيناسىنىڭ تيىمدىلىگىن ءبىز ءىس جۇزىندە كورىپ وتىرمىز. بىرىنشىدەن، ءولىم-ءجىتىم جاعدايلارى ازايعان. جالپى سىرقاتتانۋ كورسەتكىشى دە كەمىگەن. بۇل ۆاكتسينا 12 جاستان اسقان بالالاردىڭ دا، جۇكتى ايەلدەردىڭ دەنساۋلىعىنا قاۋىپ توندىرمەيدى. دۇنيەجۇزىلىك دەنساۋلىق ساقتاۋ ۇيىمىنىڭ ءوزى ۇسىنىپ وتىر»، - دەگەن مامان قازاقستاندا ەرەسەك ادامدارعا بۇگىنگە دەيىن سالىنعان ۆاكتسينالاردىڭ ءتيىمدى بولعانىنا توقتالدى.
«رەسەيلىك، قازاقستاندىق، قىتايلىق ۆاكتسينالاردىڭ بالالار مەن جۇكتى ايەلدەر ءۇشىن قانشالىقتى ءتيىمدى ەكەنى بەلگىسىز بولعانىمەن، قازىر قولدانۋ ماقساتىنا سايكەستىگىن كورسەتىپ وتىر. بۇل جەردە مىنانى ءتۇسىنۋ كەرەك. بىزدە بۇعان دەيىن ەرەسەكتەرگە سالىنعان ۆاكتسينالاردى بالالار مەن جاسوسپىرىمدەرگە سالۋعا مۇلدەم تىيىم سالىنعان دەۋگە بولمايدى. ويتكەنى ولار اتالمىش ەكى توپقا سىناق رەتىندە ەگىلگەن جوق.
«سپۋتنيك V» قازىر وسى ماسەلە بويىنشا سىناقتان ءوتىپ جاتىر. QazVac-تا بۇل ساتىدان وتەدى. ناقتى جاسوسپىرىمدەر مەن جۇكتى ايەلدەردىڭ اراسىندا سىناقتان وتكەننەن كەيىن رۇقسات ماسەلەسى شەشىلەدى. مەنىڭ ويىمشا وعان ءسال ۋاقىت كەرەك. ءتيىستى زەرتتەۋلەر جاقسى ناتيجە بەرسە، ولاردى دا اتالمىش ەكى توپقا قولدانۋىمىز مۇمكىن. ال ازىرگە Pfizer ۆاكتسيناسى عانا وسى ەكى توپقا ۇسىنىلعان. بۇعان قاراپ بىزدەگى باسقا ۆاكينالار COVID-19 ىندەتىنە Pfizer ۆاكتسيناسىنداي ءتيىمدى ەمەس دەگەن وي تۋىنداماۋى كەرەك. ءبىز قولدانىپ جۇرگەن ۆاكتسينالاردىڭ ءبارى ۆيرۋسقا ءتيىمدى ەكەنىن ۋاقىت كورسەتتى»، - دەدى مانار سماعۇل.
«ادىرنا» ۇلتتىق پورتالى
