NIS-تە باعالاۋدىڭ ءبىلىم بەرۋ ساپاسىنداعى ءرولى تالقىلاندى

1129

نازارباەۆ زياتكەرلىك مەكتەپتەرىنىڭ «جاڭا جاعدايداعى ءبىلىم بەرۋ» جوباسى اياسىندا پەداگوگيكالىق ولشەمدەر ورتالىعى وتكىزگەن ءۇشىنشى دوڭگەلەك ۇستەلى ەلىمىزدىڭ تۇكپىر-تۇكپىرىنەن مىڭعا جۋىق مۇعالىمدى جينادى

 كەزدەسۋ باعالاۋ پروتسەسى تۋرالى پەداگوگتەردىڭ وزەكتى ساۋالناماسىنان باستالدى. العاشقى ناتيجەلەر مۇعالىمدەردىڭ باسىم كوپشىلىگى (بەستەن ءتورت بولىگى) باعالاۋ ءبىلىم بەرۋدىڭ ناقتى ساپاسىن كورسەتەدى دەگەن سەنىمىن ايقىندادى. «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا ساپالى ءارى ناقتى باعا وقۋشىنىڭ دامۋىنا، ءوزىنىڭ كۇشتى نەمەسە ءالسىز تۇستارىن تۇسىنۋگە، سونداي-اق ماماندىق تاڭداۋعا جانە جالپى بولاشاعىن انىقتاۋعا اسەر ەتەتىنىن اتاپ ءوتتى:

 باعالاۋ «مەن جانە تۇجىرىمداما» ۇعىمىنىڭ قالىپتاسۋىنا، ياعني وقۋشىنىڭ ءوزى تۋرالى تۇسىنىگىنە اسەر ەتەدى. مۇعالىمنىڭ باعالاۋى، سىنىپتاستار مەن اتا-انانىڭ رەاكتسياسى ءوزىن-ءوزى باعالاۋ دەڭگەيىن ارتتىرادى. وقۋشىنىڭ باعالاۋداعى «مەن» ۇعىمىنا قاناعاتتانۋى ءوزىنىڭ جەكە ماڭىزدىلىعى مەن ءال-كۇشىن، بارابارلىعى مەن پايدالىلىعىن سەزىنۋگە، سونداي-اق وسى دۇنيەگە ءوزىنىڭ قاجەت ەكەنىن تۇسىنۋگە ىقپال ەتەدى، – دەپ اتاپ ءوتتى كۇلاش نوعاتايقىزى.

كۇلاش نوعاتايقىزىنىڭ تۇجىرىمدارى «ءبىلىم – 2030» جاھاندىق جوباسى شەڭبەرىندە ەىدۇ-نىڭ (ەكونوميكالىق ىنتىماقتاستىق جانە دامۋ ۇيىمى) زەرتتەۋ ناتيجەلەرىمەن بەكىتىلدى. جوبانىڭ ۇلتتىق ۇيلەستىرۋشىسى – NIS. باعالاۋدىڭ ءداستۇرلى مودەلدەرى وزگەرىس ۇستىندە، ال جاڭا قالىپتى جاعدايدا وقۋشىلار وزدەرىنىڭ وقۋ پروتسەسىن جاقسارتۋعا بەلسەنە قاتىسىپ كەلەدى.

پەداگوگيكالىق ولشەۋلەر ورتالىعىنىڭ ديرەكتورى ايدانا شيليبەكوۆا دوڭگەلەك ۇستەلگە قاتىسۋشىلاردىڭ نازارىن مۇعالىمدەر ءۇشىن ىشكى جانە سىرتقى باعالاۋ ناتيجەلەرىنىڭ كەلىسىمدىلىگىن قاداعالاۋدىڭ ماڭىزدى ەكەنىنە اۋداردى، بۇل ءبىلىم بەرۋ ساپاسىن قامتاماسىز ەتەدى:

– سىرتقى باعالاۋدىڭ كۇشتى جۇيەسى قوعامدىق سەنىمدى وياتا الادى.

بۇگىنگى تاڭدا قازاقستاندا دۇنيەجۇزىلىك بانكتىڭ قولداۋىمەن «وقۋشىلاردى باعالاۋ جۇيەسىن جاڭارتىلعان ءبىلىم بەرۋ مازمۇنىمەن سايكەستەندىرۋ» باعىتى بويىنشا «ورتا ءبىلىم بەرۋدى جاڭعىرتۋ» كەشەندى جوباسى ىسكە اسىرىلۋدا. Cambridge Assessment پەن NIS-ءتىڭ بۇل جوبا اياسىنداعى ارىپتەستىك بايلانىسىنىڭ ماقساتى – ورتا ءبىلىم بەرۋ جۇيەسىن دامىتۋداعى حالىقارالىق تاجىريبە مەن قازاقستاندىق جەتىستىكتەردىڭ بىرىگۋى. جوبانىڭ نەگىزگى ساراپشىلارىنىڭ ءبىرى اننا گرين حالىقارالىق باعالاۋ ستاندارتتارى جانە ولارعا قالاي سايكەس كەلۋ كەرەكتىگى تۋرالى اقپاراتپەن ءبولىستى:

 لايىقتى باعالاۋ – جاقسى ءبىلىم بەرۋدىڭ تەمىرقازىعى. ءبىز ەمتيحاندارىمىزدى ازىرلەۋ بارىسىندا وقۋشىلاردىڭ بويىنا سىڭىرگىمىز كەلەتىن دۇنيەلەردى باستى نازارعا الامىز. ولار: ءپاندى تەرەڭىنەن مەڭگەرۋ، كونتسەپتۋالدى تۇسىنىك جانە جوعارى دەڭگەيلى ويلاۋ داعدىلارى. ءبىزدىڭ باعالاۋىمىز وقۋشىلاردى ۇلگەرىمى بويىنشا ءتيىمدى سارالاۋعا مۇمكىندىك بەرەدى. ءبىز ونى ءادىل، ءۆاليدتى، سەنىمدى جانە ءىس جۇزىندە مۇمكىن بولاتىنداي ەتىپ وتكىزەمىز، – دەپ اتاپ ءوتتى Cambridge Assessment ساراپشىسى.

دوڭگەلەك ۇستەلدىڭ باسىندا ساۋالنامادان وتكەن قاتىسۋشىلاردىڭ باسىم كوپشىلىگى ستاندارتتارعا سايكەستىك ماسەلەسى مەكتەپتەردى باعالاۋ دەڭگەيىندە دە قاراستىرىلۋى كەرەك دەگەن پىكىرمەن كەلىستى. «نازارباەۆ زياتكەرلىك مەكتەپتەرى» دببۇ باسقارما ءتورايىمى ورىنباسارى ولگا موجاەۆانىڭ بايانداماسى حالىقارالىق دەڭگەيدەگى مەكتەپ قىزمەتىن باعالاۋ تاسىلدەرىنىڭ ءبىرى – اككرەديتتەۋگە نەگىزدەلدى. سپيكەر حالىقارالىق اككرەديتتەۋ پروتسەسىندە مەكتەپتەردىڭ ىشكى ءوزىن-ءوزى باعالاۋىن ەرەكشە ماڭىزدى كەزەڭ دەپ اتادى. NIS مىسالىندا ولگا يۆانوۆنا ورتا ءبىلىم بەرۋ ۇيىمدارى ءۇشىن ءوزىن-ءوزى باعالاۋدىڭ ماڭىزدىلىعىن تالدادى:

جالپى ءبىلىم بەرەتىن مەكتەپتەر زياتكەرلىك مەكتەپتەردىڭ ءوزىن-ءوزى تالداۋ جانە ءوزىن-ءوزى باعالاۋ تاجىريبەسىن قولدانىستاعى ستاندارتتارعا سايكەس وزدەرىنىڭ كۇشتى جانە ءالسىز جاقتارىن ءتۇسىنۋ مەن دامىتۋ بويىنشا ناقتى شارالاردى جوسپارلاۋ ءۇشىن پايدالانا الادى. NIS ءاربىر مۇددەلى مەكتەپكە كونسۋلتاتسيالىق، ادىستەمەلىك جانە ادىسنامالىق قولداۋ كورسەتۋگە دايىن، – دەپ قورىتىندىلادى ولگا موجاەۆا.

مۇعالىمدەردىڭ الدىندا تۇرعان نەگىزگى مىندەتتەردىڭ ءبىرى – باعالاۋدى وقۋ پروتسەسىنە كەدەرگى كەلتىرمەيتىن جۇيە رەتىندە قالىپتاستىرىپ، ونى جاقسارتۋ. بۇل پىكىردى نازارباەۆ ۋنيۆەرسيتەتىنىڭ پروفەسسورى مەتيۋ كورتني ۇستانادى. پەداگوگيكالىق ولشەۋلەر ورتالىعى ديرەكتورىنىڭ ورىنباسارى ساۋلە ۆيلدانوۆا شەتەلدىك ساراپشىنىڭ وي-پىكىرىن جالعاستىرا وتىرىپ، مۇعالىمدەر پراكتيكاسىنىڭ باعالاۋ ءادىسناماسىنا جان-جاقتى توقتالدى. ساۋلە ايفوۆنا باعالاۋ تەك وقۋشىلارعا عانا ەمەس، سونداق-اق پەداگوگقا دا بايلانىستى ەكەندىگى تۋرالى پىكىرمەن ءبولىستى – كەز كەلگەن وقۋشى تۇسىنىكتى ءارى قىزىقتى ساباق بەرە الاتىن مۇعالىمنىڭ دارىسىنە قاتىسىپ، ءادىل باعا العىسى كەلەدى، سەبەبى بۇل ءۇردىس جوعارى ناتيجە اكەلەتىنى ءسوزسىز.

قازاقتىڭ اقىنى ءارى ۇستازى ماعجان جۇماباەۆ وسكەلەڭ ۇرپاقتى وقىتۋ مەن تاربيەلەۋدە كوپعاسىرلىق سالت-داستۇرلەردى جانە حالىقتىڭ پەداگوگيكالىق مۇراسىن پايدالانۋدى ەرەكشە اتاپ وتكەن. ءوز ەڭبەكتەرىندە ول بۇگىندە ەنگىزىلگەن كريتەريالدى تاسىلگە سايكەس كەلەتىن باعالاۋدى دۇرىس ءتۇسىنۋ تۋرالى يدەيالاردى بىرنەشە رەت كورسەتكەن. تاربيەلىك اسپەكت مۇعالىمنىڭ ساباقتاعى قىزمەتى ارقىلى كورىنەدى. ادەبي شىعارمالار مەن ماتەماتيكانى بىرىكتىرەتىن قىزىقتى تاپسىرمالار ازىرلەۋ تاجىريبەسىمەن NIS-ءتىڭ ماتەماتيكا ءپانى مۇعالىمى انار بايمۋرزاەۆا ءبولىستى، ال ءوزىن-ءوزى باعالاۋ جانە كەرى بايلانىس ارقىلى وقۋ ماتەريالىن تەرەڭ مەڭگەرۋگە ىقپال ەتەتىن باعالاۋ تۋرالى مىسالدى ەلوردالىق №48 مەكتەپ-ليتسەيىنىڭ قازاق ءتىلى مەن ادەبيەتى ءپانى مۇعالىمى گۇلشات كاپشاەۆا ۇسىندى.

پەداگوگتاردىڭ باعالاۋعا قاتىستى تۇجىرىمدامالارى مەن پايىمداۋىنا مەكتەپ وقۋشىلارى دا شىنايى پىكىرلەرىن ءبىلدىردى. ايتا كەتۋ كەرەك، ءبىلىم الۋشىلاردىڭ كوزقاراسى ءار الۋان – ءبىرى باعالاۋ نە ىستەۋ قاجەت جانە قانداي باعىتتا قوزعالۋ كەرەك ەكەنىن تۇسىنۋگە كومەكتەسەدى دەپ سەنەدى، ال ءبىرى ماتەريالدى يگەرۋ – ەڭ ماڭىزدى ءۇردىس، ول ءۇشىن باعا قويۋ مىندەتتى ەمەس دەپ ەسەپتەيدى.

كەزدەسۋدى قورىتىندىلاي كەلە كۇلاش ءشامشيدينوۆا كەز كەلگەن باعالاۋ جۇيەسى ادامدى وقۋعا ىنتالاندىرۋى ءتيىس ەكەنىن، ال شىنايى ساپالى باعالاۋ جۇيەسى مۇعالىمنىڭ كۇندەلىكتى جۇمىسىن ءساتتى كورسەتەتىنىن اتاپ ءوتتى. ساپا – باعالاۋدىڭ باستى ماقساتتارىنىڭ ءبىرى.

دوڭگەلەك ۇستەل بارىسىندا ۇسىنىلعان ماتەريالدار «نازارباەۆ زياتكەرلىك مەكتەپتەرى» دببۇ-نىڭ جۇيەلىك-ادىستەمەلىك وقۋ كەشەنىندە جاريالانادى.

«ءبىلىم ساپاسىن قامتاماسىز ەتۋدەگى باعالاۋدىڭ ءرولى» – ىبىراي ءالتىنساريننىڭ 180 جىلدىق مەرەيتويىنا ارنالعان «جاڭا جاعدايداعى ءبىلىم بەرۋ» جوباسى اياسىندا NIS-تە وتكەن ءۇشىنشى دوڭگەلەك ۇستەل.

 

 

 

پىكىرلەر
رەداكتسيا تاڭداۋى