قاقاعان ايازدا قينالعان بايان-ولگيدەگى قازاق وتباسىلارىنا فرانتسيا قازاقتارى كومىر ءتۇسىرىپ بەرىپ، كيىم-كەشەك تاراتتى. كومەك العان وتباسىلار الەۋمەتتىك جەلىدە العىس جاۋدىرىپ جاتىر، دەپ جازادى centralasian.org پورتالى.
موڭعوليانىڭ بايان-ولگي ايماعىندا شامامەن 100 مىڭعا جۋىق قازاق وتباسى تۇرادى. قاڭتار ايىنىڭ ورتاسىندا قىستىڭ قاتتى بولىپ جاتقانىن ەستىگەن فرانتسياداعى قازاق قوعامى (AKFT) موڭعوليالىق قازاق وتباسىلارىنا كومىر مەن وزگە دە قاجەتتى زاتتار الۋى ءۇشىن اقشا جيناپ بەرىپتى.
- شامامەن 40 تونناداي كومىر الدىق. ودان بولەك وتىن، كيىم-كەشەك، وقۋشى بالالارعا داپتەر، قالام، قاعاز-قارىنداش الدىردىق. كومىرى جوق وتباسىلارعا ماشينامەن ءتۇسىرىپ بەردىك. كومىر الماعاندار وتىن، كيىم-كەشەك سياقتى زاتتار الدى. مۇندا كەدەي وتباسىلار كوپ، - دەيدى بايان-ولگي تۇرعىنى داكەي بىقيۇلى.
ونىڭ ايتۋىنشا، بيىل قىس قاتتى بولعاندىقتان ايماقتاعى كوپ وتباسى كومىر تۇسىرەتىن اقشالارى بولماي، قينالىپ قالعان. فرانتسيا قازاقتارى جىبەرگەن كومەك قىستىڭ كوزى قىراۋدا ءسال دە بولسا دەمەۋ بولعان.
فرانتسياداعى قازاقتار قوعامىنىڭ دەرەگىنشە، قازىر فرانتسيادا 250-دەي قازاق وتباسى تۇرادى. ولاردىڭ 175-ءى قوعامعا مۇشە. پاريجدەن الىستاۋ جەرلەردە تۇراتىندارى قوعامعا ءالى تىركەلمەگەن.
بيىل موڭعوليامەن قاتار قازاقستاندا دا قاڭتار ايىندا كۇن قاتتى سۋىپ، شىڭىلتىر اياز كەزىندە بىرنەشە قالادا مەكتەپتەر جابىلىپ، كومىر مەن گاز تاپشىلىعى بايقالعان.
