جىل قورىتىندىسى بويىنشا پروكۋراتۋرا ورگاندارىنىڭ بىرقاتار باسشىلارى جازالاندى، - دەپ حابارلايدى قر باس پروكۋراتۋراسىنىڭ ءباسپاسوز قىزمەتى.
"2018 جىلدىڭ 26 قاڭتارىندا وتكەن باس پروكۋراتۋرانىڭ كەڭەيتىلگەن القا وتىرىسى جۇمىسىنىڭ قورىتىندىسى بويىنشا قىلمىستىق جانە ازاماتتىق پروتسەستە، قىلمىستىق جازانى اتقارۋ سالاسىندا، سونداي-اق اتقارۋ وندىرىستەرىندە زاڭدىلىقتى قامتاماسىز ەتۋدە ايتارلىقتاي كەمشىلىكتەر انىقتالدى", - دەپ حابارلادى ۆەدومستۆو وكىلدەرى.
وسى انىقتالعان بۇزۋشىلىقتار باس پروكۋراتۋرانىڭ تارتىپتىك كوميسسياسىندا قارالىپ، قازاقستان رەسپۋبليكاسى باس پروكۋرورىنىڭ بۇيرىعىمەن تارتىپتىك تەرىس قىلىعى ءۇشىن الماتى قالاسى پروكۋرورى عابيت ميرازوۆ لاۋازىمىنان بوساتىلعان، سونداي-اق قاداعالاۋ قىزمەتىن لايىقتى ۇيىمداستىرماعانى، قىلمىستىق پروتسەستە جۇيەلى بۇزۋشىلىقتارعا جول بەرگەنى جانە سوتتا مەملەكەت مۇددەسىن ءتيىمسىز وكىلدىك ەتكەنى ءۇشىن اقتوبە وبلىسى پروكۋرورىنىڭ ورىنباسارى دانيار سىزدىقوۆ پەن وڭتۇستىك قازاقستان وبلىسى پروكۋرورىنىڭ ورىنباسارى ءابىل قوجاحمەتوۆ اتقارعان قىزمەتتەرىنەن بوساتىلعان.
اقتوبە وبلىسىنىڭ پروكۋرورى م.ج. قايىبجانوۆ، اقمولا وبلىسىنىڭ پروكۋرورى ت.ع. تاشىمباەۆ، سولتۇستىك قازاقستان وبلىسىنىڭ پروكۋرورى ب.ن. اسىلوۆ، سونداي-اق بىرقاتار وبلىس پروكۋرورلارىنىڭ ورىنباسارلارى، ونىڭ ىشىندە پاۆلودار وبلىسى پروكۋرورىنىڭ ورىنباسارى ب.ك. مىرزاكەروۆ، الماتى وبلىسى پروكۋرورىنىڭ ورىنباسارى س.س. باكيروۆ، قىزىلوردا وبلىسى پروكۋرورىنىڭ ورىنباسارى ج.ب. ەلامانوۆ، اتىراۋ وبلىسى پروكۋرورىنىڭ ورىنباسارلارى س.ر. شالاباەۆ، م.ا. تولەۋباەۆ، ماڭعىستاۋ وبلىسى پروكۋرورىنىڭ ورىنباسارى ا.ا. دوسەكەنوۆ، جانە تاراز قالاسىنىڭ پروكۋرورى ب.س. سەيىلحانوۆ پەن قاراعاندى وبلىسى قازىبەك بي اۋدانى پروكۋرورى د.س.قاراجاسپاەۆ ءارتۇرلى تارتىپتىك جاۋاپكەرشىلىككە تارتىلعان.
tengrinews.kz
