ماڭعىستاۋ وبلىستىق تجد باستىعىنىڭ ورىنباسارى بەكبولات ابدىقادىروۆ اقتاۋداعى جويقىن جارىلىستىڭ الدىن الا سەبەبىن اتادى. بۇل تۋرالى ماڭعىستاۋ وبلىسى اكىمدىگىنە قاراستى قوعامدىق كوممۋنيكاتسيا ورتالىعىنىڭ Facebook پاراقشاسى حابارلادى، دەپ مالىمدەيدى "ادىرنا" ۇلتتىق پورتالى.
اكىمدىك دەرەگىنشە، بۇگىندە جارىلىس سالدارىن جويۋ جۇمىستارىمەن 70 قۇتقارۋشى، 10 تەحنيكا بىرلىگى اينالىسىپ جاتىر. توتەنشە جاعداي ورنىندا 150 پوليتسەي مەن ازاماتتىق قورعانىس ورگاندارى، ەنەرگەتيكا ماماندارى جۇمىس ىستەۋدە.
- "شەرقالا" كەشەنى يەسىنىڭ ايتۋىنشا، بارلىق جۇمىسشىلار عيماراتتان كەشكى ساعات 18:00 مەن 20:00-اراسىندا كەتكەن. ماڭعىستاۋ وبلىسى توتەنشە جاعدايلار دەپارتامەنتى باسشىسىنىڭ ورىنباسارى بەكبولات ابدىقادىروۆتىڭ ايتۋىنشا، جارىلىستىڭ الدىن الا سەبەبى گاز-اۋا قوسپاسىنىڭ تاراۋى بولۋى مۇمكىن. جارىلىس ورنىنان ەكى گاز بالونى شىعارىلدى. "عيمارات يەسىنىڭ ايتۋىنشا، قوقىس استىندا ارقايسىسى سىيىمدىلىعى 50 ليتر بولاتىن تاعى ەكى گاز بالونى بار. تولىعىراق اقپارات اۆاريالىق-قۇتقارۋ جۇمىستارى جويىلعاننان كەيىن جۇرگىزىلەدى", - دەپ حابارلادى بەكبولات ابدىقادىروۆ.ايتا كەتەيىك، كەشە، 7 قاراشا كۇنى اقتاۋدا جويقىن جارىلىس بولىپ، ەكىقاباتتى عيماراتتىڭ تاس-تالقانى شىقتى. باستاپقىدا الەۋمەتتىك جەلىدە تج سالدارىنان قازا تاپقاندار تۋرالى اقپارات پايدا بولعان ەدى. الايدا، بۇل مالىمەتتى ماڭعىستاۋ وبلىستىق اۋرۋحاناسىنىڭ باس دارىگەرى تەرىسكە شىعاردى. ول جارىلىستان زارداپ شەگىپ، مەديتسينالىق مەكەمەلەرگە جۇگىنگەندەر بولماعانىن ايتتى.
"ادىرنا" ۇلتتىق پورتالى
