شىمكەنتتە بوي كوتەرگەن «راحمەت ساعان، اناشىم» قوعامدىق بىرلەستىگى «يماندىلىق – جۇرەككە ۇيالاسا» اتتى تاقىرىپتا ءىس-شارا ۇيىمداستىردى.
مەرەكەلىك جيىننىڭ باستى ەرەكشەلىگى، كەزدەسۋگە 18 جاستان اسقان مۇمكىندىگى شەكتەۋلى جاندار مەن انالارى ارنايى شاقىرتۋ الدى. ايتۋلى ازاماتتار ەندى، قاجەتتىلىكتەرمەن قامتىلعان ورتالىققا تۇراقتى تۇردە كەلەتىن بولادى.
«اق كوگەرشىن» ءانىن شىرقاعان اسەلدىڭ بۇگىن تۋعان كۇنى. تاعدىردىڭ تاۋقىمەتىنە مويىماعان قايسار قىز 27 جاسقا تولدى.
ەندى ەرەكشە جاندار ۇيلەرىندە قامالماي «راحمەت ساعان ،اناشىم» قوعامدىق بىرلەستىگىندە وزدەرىنىڭ قاتارىمەن جۇزدەسىپ كوڭىلدەرىن كوتەرەدى. سونىمەن قاتار وسىنداعى وڭالتۋ بولمەسىندە ساۋىقتىرۋ جاتتىعۋلارىن جاسايدى.
ال جاھانگەردىڭ اناسىنىڭ قۋانىشى ءتىپتى ەرەكشە. سەبەبى، بىرلەستىككە كەلگەننەن بەرى 20 جاستاعى ۇلىنىڭ ومىرگە دەگەن قۇلشىنىسى ارتقان.
ناعيما تىلەگەنوۆا، جاھانگەردىڭ اناسى: «ءبىر اي بولدى وسى جەرگە كەلىپ جاقسى بولىپ قالدى. ايتپەسە، بالام كۇيزەلىستەن تاماق جەۋدەن قالعان ەدى.مىنا بىرلەستىكتە ءوزى سياقتى دوستار تاۋىپ مەيىرىمدى جاندارمەن تابىسىپ ، ءوزىنىڭ جالعىز ەمەس ەكەندىگىن ءتۇسىندى».
قوعامدىق بىرلەستىكتىڭ اشىلۋىنا ۇيىتقى بولعان ەرەكشە جانداردىڭ انالارى. سولاردىڭ ءبىرى بىرلەستىكتىڭ ءتورايىمى، ەكى ەرەكشە جاننىڭ اناسى.
الماگۇل كەنجەتاەۆا، «راحمەت ساعان، اناشىم» قوعامدىق بىرلەستىگىنىڭ ءتورايىمى: «ۇكىمەت تاراپىنان 18 دەيىنگى مۇگەدەك بالالارعا قامقورلىق بار، وڭالتۋ ورتالىقتارى، ساناتوري، كۋرورتقا جولداما بەرىلەدى. 18 اسقان سوڭ ولار اسا قولداۋدى قاجەت ەتەدى. قازىر مىنە وسىنداي بالالارعا ازىرشە 12 بالاعا وڭالتۋ ورتالىعىن اشىپ وتىرمىز».
جەرگىلىكتى بيلىك ، جومارت جانداردىڭ قولداۋى ارقاسىندا بىرلەستىك قىزمەتىن كەڭەيتپەك. مۇنداي جوسپار تۇزۋگە قالا اكىمدىگى تاراپىنان جوندەۋدەن وتكەن عيمارات، دەمەۋشىلەردىڭ كومەگى سەپ بولدى دەيدى وسىنداعىلار. اعىنان جارىلا العىس بىلدىرگەندەر قاتارىندا داۋلەتتىڭ اناسى باحتىلى دا بار: » اللاعا شۇكىر، اتقا ءمىنىپ، جاتتىعۋلار جاساپ قازىر ازامات، بارلىعىنا راحمەت».
ماقسۇت سارسەنباەۆ، «سىناق» قوعامدىق بىرلەستىگىنىڭ مۇشەسى: «18 جاستان اسقان مۇگەدەكتەرگە» شاپاعات» وڭالتۋ ورتالىعى بار. مىنە تاعى ءبىر ورتالىق جۇمىسىن باستادى. ول جاقسى قولداۋ. بىراق ايتارىم مۇگەدەكتەر قالادا، مەملەكەتىمىزدە از بولسىن».
ەرەكشە بالالاردىڭ قوعامعا بەيىمدەلىپ، ءومىر سۇرۋىنە انالارىنىڭ ەڭبەگى وراسان دەيدى، دەمەۋشىلەر. ايتۋلى مەرەكەلىك شارادا بارلىق اۋىرتپاشىلىقتاردى سانامەن سارالاپ، كەلەشەكتى ويلاعان انالارىمىز ءبىر ساتكە بولسا دا قيىندىقتى ۇمىتىپ، بالالارىمەن كوڭىل كوتەردى.
شىنار ورازوۆا
