مۇحتار اۋەزوۆ اتىنداعى قازاق دراما تەاترىنا جاڭا ديرەكتور بولىپ اسحات ماقسىمۇلى ماەميروۆ تاعايىندالدى، - دەپ حابارلايدى تەاتر ءباسپاسوز قىزمەتى.
اسحات ماقسىمۇلى ماەميروۆ 1974 جىلى 12 ناۋرىزدا باتىس قازاقستان وبلىسى سىرىم اۋدانىندا تۋعان. 1991 - 1995 جىلدارى باتىس قازاقستان مەملەكەتتىك ۋنيۆەرسيتەتى (بۇرىنعى ا.س.پۋشكين اتىنداعى ورال پەداگوگيكا ينستيتۋتى)نىڭ فيلولوگيا فاكۋلتەتىن بىتىرگەن. 1995 - 1996 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ "دراما رەجيسسەرى" ماماندىعى بويىنشا قازاقستاننىڭ حالىق ءارتيسى، پروفەسسور مامان بايسەركەنوۆتىڭ كلاسسىن بىتىرگەن. 2008 جىلى قازاقستان رەسپۋبليكاسىنىڭ پرەزيدەنىتىنىڭ "بولاشاق" حالىقارالىق ستەپەندياسىنىڭ يەگەرى. سول جىلى Université Sorbonne Nouvelle Paris ۋنيۆەرسيتەتىندە ءبىلىمىن جەتىلدىرگەن. (فرانتسيا، پاريج); 2008 جىلى پاريج ۇلتتىق ونەر كونسەرۆاتورياسىنىڭ "درامالىق ونەر" ماماندىعى بويىنشا تاعلىمدامادان وتكەن (فرانتسيا، پاريج); 2010 جىلى رەسەيدىڭ اتاقتى گيتيس ونەر اكادەمياسىندا تەاتر ونەرى بويىنشا ماگيستر عىلىمي اتاعىن الدى.قازاقستاننىڭ ەڭبەك سىڭىرگەن قايراتكەرى (2015), قازاقستاندىق تەاتر رەجيسسەرى. قازاقكونتسەرت ونەر بىرلەستىگىنىڭ باس ديرەكتورى (2017 جىلدان). فيلوسوفيا عىلىمدارىنىڭ دوكتورى (PhD 2016).
ەسكە سالايىق، 7 اقپاندا مۇحتار اۋەزوۆ اتىنداعى قازاق دراما تەاترىنىڭ بۇرىنعى ديرەكتورى ەرلان بىلالگە قاتىستى سوت ۇكىمى شىققان ەدى.
"سوت ەرلان ءبىلالدى قر قىلمىستىق كودەكسىنىڭ 24-بابىنىڭ 3-بولىگى جانە 366-بابى بويىنشا ايىپتى دەپ تانىپ، 52 500 000 تەڭگە كولەمىندە ايىپپۇل سالۋ تۋرالى ۇكىم شىعارادى", - دەپ وقىدى ۇكىمدى سۋديا.
سونداي-اق، سوت ءبىلالدى مەملەكەتتىك قىزمەتتەرگە ورنالاسۋ قۇقىعىنان ءومىر بويىنا ايىردى. مۇنىمەن قاتار، سۋديا سوتتالۋشىنىڭ "قازاقستاننىڭ ەڭبەك سىڭىرگەن قايراتكەرى" اتاعىنان ايىرۋ تۋرالى ۇسىنىس جولداناتىنىن مالىمدەدى.
وعان قر قىلمىستىق كودەكسىنىڭ 24-بابىنىڭ 3-بولىگى جانە 366-بابىنىڭ 2-بولىگى "پارا الۋعا وقتالۋ" بويىنشا ايىپ تاعىلدى. سوتقا دەيىنگى تەرگەۋ ورگانىنىڭ مالىمەتى بويىنشا، ءبىلال "سەزام" قوعامدىق قايىرىمدىلىق شىعارماشىلىق قورىنىڭ پرەزيدەنتى قايرات بايانوۆتان اۋەزوۆ تەاترىنىڭ قابىرعاسىندا جاڭاجىلدىق قويىلىمدار قويۋ ءۇشىن 1,5 ميلليون تەڭگە پارا الماق بولعان.
سوتتا سۋديا قۋانىش ءارىپوۆ تورەلىك ەتتى. مۇنىڭ الدىندا ەرلان ءبىلال قىلمىسىن مويىنداعان بولاتىن.
"سىياقى تۋرالى كەلىستىك، سوسىن 2 قاڭتاردا كەزدەسىپ، ول ماعان 600 مىڭ تەڭگە بەردى. ەكىنشى رەت 4 قاڭتاردا 900 مىڭ تەڭگە بەردى دە، مەن سول كۇنى ۇستالدىم. كىنامدى تولىق مويىندايمىن، وكىنىش بىلدىرەمىن. باسىندا بايانوۆ ماعان ءوزى ۇسىنعان. بىزدە جىلدا شىرشالار، قويىلىمدار وتەدى. ءوزى كەلدى. قازاقشا ايتقاندا ريزالىعىن ءبىلدىرۋ ءۇشىن. باسىندا سومانى دا ءوزى ايتقان بولاتىن. 600 مىڭدى قايدا جاراتقانىم ەسىمدە جوق، قارىزدارىمدى قايتارىپ جۇرگەنمىن. ەشكىم قىسىم جاساعان جوق، كىنامدى ءوزىم مويىندادىم", - دەگەن ەدى ەرلان ءبىلال سوت وتىرىسى كەزىندە.
ايتا كەتەيىك، ەرلان ءبىلالدىڭ ادۆوكاتى ءىستىڭ باق وكىلدەرىنىڭ قاتىسۋىنسىز ءوتۋىن سۇراعان ەدى. سۋديا تاراپتار پىكىرىن تىڭداپ، اۋديوجازباعا، سۋرەتكە جانە ۆيدەوعا تۇسىرۋگە تىيىم سالدى.
مۇنىڭ الدىندا سوت ەرلان ءبىلالدى كەپىلمەن بوساتقان ەدى. ول 1 ميلليون 205 مىڭ تەڭگە كولەمىندە كەپىل سوماسىن بەردى.
ەسكە سالايىق، 5 قاڭتاردا قر ەڭبەك سىڭىرگەن قايراتكەرى، اكتەر، م. اۋەزوۆ اتىنداعى قازاق مەملەكەتتىك اكادەميالىق دراما تەاترى باسشىسى ەرلان ءبىلالوۆ 1,5 ميلليون تەڭگە پارامەن ۇستالعانى حابارلانعان بولاتىن. كىناسىن تولىق مويىنداۋىنا بايلانىستى ەرلان ءبىلالوۆ قاماۋعا لالىنبادى.
وسىدان كەيىن 9 قاڭتاردا اۋەزوۆ تەاترى ديرەكتورى مىندەتىن اتقارۋشى تاعايىندالعان. ال 17 قاڭتاردا ەرلان ءبىلالدىڭ ءىسى سوتقا تۇسكەن ەدى.
tengrinews.kz
