شىمكەنتتە كوز اۋرۋلارى كلينيكاسى اشىلدى

3518
Adyrna.kz Telegram

شىمكەنتتە كوز اۋرۋى بار ناۋقاستاردى قابىلدايتىن كلينيكا اشىلدى. 1934 جىلدان بەرى قىزمەت اتقارىپ كەلە جاتقان الماتى كوز اۋرۋلارى قازاق عىلىمي-زەرتتەۋ ينستيتۋتى قالامىزدا كلينيكاسىن اشتى. قازاقستاننىڭ وڭتۇستىك ءوڭىرى بولىمشەسى ساناتىنداعى بۇل كلينيكا وزىق مەديتسينالىق جابدىقتارمەن قامتىلعان.

زاماناۋي ۇلگىدەگى جاڭا مەديتسينالىق ورتالىقتىڭ اشىلۋ راسىمىنە پارلامەنت ءماجىلىسىنىڭ دەپۋتاتتارى، دەنساۋلىق ساقتاۋ مينيسترلىگىنىڭ وكىلدەرى جانە شىمكەنت قالاسىنىڭ اكىمى قاتىستى.

اشىلۋ سالتاناتىندا ءسوز العان قالا باسشىسى مۇرات ايتەنوۆ كلينيكانىڭ اشىلۋى ارقىلى تۇرعىنداردىڭ ساپالى مەديتسينالىق كومەككە، بىلىكتى دارىگەرلەردەن كەڭەس الۋعا قولجەتىمدىلىك ارتقانىن اتاپ ءوتتى.
«بۇل كلينيكا شىمكەنت قالاسىمەن بىرگە جامبىل، قىزىلوردا، تۇركىستان وبلىستارىنىڭ تۇرعىندارىنا قىزمەت كورسەتەدى. كۇردەلى وتا جاساتۋ ءۇشىن تۇرعىندار بۇرىن نۇر-سۇلتان، الماتى قالالارىنا بارسا، ەندى مۇنداي كۇردەلى وتالار قالامىزدا جاسالادى.
مەديتسينالىق كومەك ساپاسىن ارتتىرۋ – مەملەكەتتىك ساياساتتىڭ باسىم باعىتى. بيىلعى جىلى قالامىزدا 5 مەديتسينا ورتالىعى اشىلدى. سوڭعى 2 جىلدا مەديتسينا ۇيىمدارىنىڭ ماتەريالدىق-تەحنيكالىق بازاسىن جاڭارتۋعا 12,9 ملرد. تەڭگە باعىتتالدى. جاڭارۋ كورسەتكىشى 81 پايىزعا جەتەدى. الداعى 5 جىلدا 1 مىڭ ورىندىق اۋرۋحانا، 10 ەمحانا، 12 دارىگەرلىك امبۋلاتوريا سالىنادى. جىل سايىن 300 دارىگەر شەت ەلدەرگە بىلىكتىلىگىن ارتتىرۋعا جىبەرىلەدى»، - دەدى م.ايتەنوۆ.

شىمكەنت قالاسىندا اشىلعان كلينيكا تۇتاس وڭتۇستىك ءوڭىرىنىڭ تۇرعىندارىنا قىزمەت كورسەتەتىن بولادى. مۇندا كۇندىزگى جانە تاۋلىك بويى ستانتسيونارلار اشىلىپ، 38 توسەك ورنى دايىندالعان. كلينيكادا كونسۋلتاتيۆتى-دياگنوستيكالىق، لازەرلىك ەم بولىمشەلەرى اشىلعان.

كلينيكا ادام ورگانيزمىنىڭ كورۋ قابىلەتىمەن بايلانىستى 15 اۋرۋ تۇرلەرى بويىنشا نوزولوگيالىق قىزمەت كورسەتىپ، ەم شارالارىن جۇرگىزەدى. جوعارى مەديتسينالىق تەحنولوگيالاردىڭ كومەگىمەن وتانىڭ 9 ءتۇرى جاسالىپ، ناۋقاستاردىڭ تولىق قالپىنا كەلۋىنە دەيىن دارىگەرلىك كۇتىمگە الىنادى. كلينيكاداعى العاشقى وتا بۇگىن جاسالادى، وعان دارىگەرلەر ۇجىمى تولىق دايىن.

ورتالىقتا 81 ادام جۇمىسپەن قامتىلدى. ونىڭ ىشىندە 21 ادام تاجىريبەلى دارىگەرلەر بولسا، ورتا بۋىن مەديتسينا قىزمەتكەرلەرىنىڭ سانى 30 ادام. قالعاندارى كومەكشى پەرسونالدى قۇرايدى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر