شىمكەنتتەگى №1 كلينيكالىق اۋرۋحانادا 2014 جىلدان بەرى 172 بۇيرەك جانە 24 باۋىر الماستىرۋ وتاسى جاسالعان. ال، 2019 جىلى ابىلاي دونباي باستاعان كلينيكالىق اۋرۋحانانىڭ ترانسپلانتولوگ دارىگەرلەرى باۋىر ترانسپلانتاتسياسى وتاسىن 5 ساعات 48 مينۋتتا جاساپ، قازاقستاندىق رەكوردتى جاڭارتقان بولاتىن.
تاۋلىك بويى جۇمىس ىستەيتىن اۋرۋحانا 520 توسەك ورىنعا ەسەپتەلگەن. بۇدان باسقا، شىلدە ايىنان باستاپ اۋرۋحانا بازاسىندا 170 ورىنعا ارنالعان ينفەكتسيالىق ستاتسيونار اشىلعان. بۇگىندە مۇنداعى قابىلداۋ بولىمىنە كۇندەلىكتى 350-دەن اسا ناۋقاس مەديتسينالىق كومەككە جۇگىنەدى ەكەن.
جالپى اۋرۋحانادا حيرۋرگيالىق، نەيروحيرۋرگيا، ۋرولوگيا، سىندى 22 بولىمشە مەن ينسۋلت ورتالىعى، كت، مرت جانە انگيوگروف كابينەتتەرى جاساقتالعان. بۇگىنگى تاڭدا اۋرۋحانا قىزمەتكەرلەرى 2019 جىلدىڭ ىسكە قوسىلعان «DamuMed» اقپاراتتىق جۇيەسىمەن جۇمىس ىستەۋدە. سونداي-اق، ورتالىق 299 كومپيۋتەر جانە 10 پلانشەتپەن قامتاماسىز ەتىلگەن.
ءمولدىر يبادۋللاەۆا
