الماتى وبلىسىندا سۋ بوگەتى جارىلدى

5471
Adyrna.kz Telegram

الماتى وبلىسى، مىڭباەۆ اۋىلى ماڭىنداعى كنيجەۆسكايا سۋ قويماسىندا بوگەت جارىلدى. شامامەن سۋدىڭ تاسۋ كولەمى سەكۋندىنا 30 تەكشە مەتر، دەپ حابارلايدى "ادىرنا" ۇلتتىق پورتالى.

- 21 قاراشا كۇنى ساعات 23:13-تە وبلىستىق تجد قىزمەتىنە الماتى وبلىسى جامبىل اۋدانى مىڭباەۆ اۋىلى ماڭىنداعى سۋ بوگەتىنىڭ بۇزىلعانى تۋرالى حابارلاندى. بوگەتتە 4,47 ميلليون كۋبومەتر سۋ قورى بار. 5-6 مەتر بولاتىن جارىقتان سەكۋندىنا 30 كۋبومەتر سۋ كەتۋدە، —دەپ مالىمدەدى تجم رەسمي وكىلى تالعات ءۋالي.

تجم مالىمەتىنشە، ارنا بۇزعان اعىن سۋ قارعالى وزەنىنە قۇيىلىپ، ءارى قاراي ىلە اۋدانىنداعى كۇرتى سۋ قويماسىنا بارىپ قوسىلادى. كۇرتى سۋ قويماسىندا شامامەن 120 ميلليون كۋبومەتر سۋ بار.

قۇداي ساقتاپ، تاسقىننان زارداپ شەككەندەر مەن كىسى شىعىنى جوق. اعىن سۋ وبلىستىق دەڭگەيدەگى مىڭباەۆ-قاسىمبەك تاس جولىن شايىپ كەتكەن. قازىر وقيعا ورنىنا پوليتسيا بەكەتتەرى ورناتىلدى.

- اعىن سۋدىڭ ارىنى باسىلدى. قارعالى وزەنىن جاعالاپ ءوتۋ جولدارى جاسالىپ جاتىر. ازىرگە ماڭايداعى ەلدى مەكەندەردى سۋ باسۋ قاۋپى جوق، — دەيدى تالعات ءۋالي.

وقيعا ورنىندا وبلىستىق تجد باسشىسىنىڭ باسقارۋىمەن تجم قۇتقارۋ قىزمەتىنىڭ قۇرامى مەن جەرگىلىكتى اتقارۋ ورگانى ماماندارى جانە باسقا دا مەملەكەتتىك قىزمەتكەرلەر جۇمىس ىستەپ جاتىر. جەدەل شتاب جاساقتالدى.

"ادىرنا" ۇلتتىق پورتالى

پىكىرلەر