الماتى وبلىسى، ەڭبەكشىقازاق اۋدانىندا نۇرا دەگەن ىنتىماعى ۇيىعان اۋىل بار. قۇلجا تۇراسساسىنىڭ بويىنداعى وسى اۋىلدىڭ ىرگەتاسىن قالاپ، كەرەگەسىن كەڭەيتكەن —ەسبەرگەنۇلى ساعىنىش دەگەن كىسى. تاقىر جەردەن تاۋ تۇرعىزباسا دا، باقشا، باۋعا تولى اۋىل سالعان قايراتكەر. ارتىنا وشپەس ءىز قالدىرىپ، ونەگەلى ءومىر سۇرگەن ساعىنىش ەسبەرگەنۇلىنىڭ ەسىمىن اۋىلداستارى قاشاندا قۇرمەتتەيدى. ساعىنىش ەسبەرگەنۇلىنىڭ اتىندا قازاق كۇرەسىنەن جىل سايىن ءداستۇرلى تۋرنير وتەدى. جەتكىنشەك بالۋانداردىڭ قىزىققا تولى وبلىستىق اشىق ءتۋرنيرى بيىل دا جالاۋىن جەلبىرەتتى.
2009-2012 جىلى تۋعان جاسوسپىرىمدەر اراسىنداعى تۋرنيرگە ەلىمىزدىڭ ءار ايماعىنان تالاپتى دا، تالانتتى بالۋان بالالار قاتىستى.
- مۇنداي جارىستاردىڭ كوبىرەك ۇيىمداستىرىلعانى جەتكىنشەكتەردىڭ شىڭدالۋىنا وراسان مۇمكىندىك بەرەدى. كەزىندە ءوزىمىز دە وسى تۋرنيرگە قاتىسىپ، قاناتتاندىق. جارىسقا جان-جاقتان جينالعان بالۋانداردىڭ بەلدەسۋىن كورىپ كوڭىلىمىز ءوستى. قازاق كۇرەسىنىڭ قانات جايىپ، كەڭىنەن تارالۋىنا وسىنداي جارىستاردى ءجيى وتكىزۋدىڭ تيگىزەر سەپتىگى مول، - دەيدى ءتۋرنيردى ۇيىمداستىرۋ القاسىنىڭ توراعاسى، شەلەك اۋىلىنداعى №2 بالالار مەن جاسوسپىرىمدەر سپورت مەكتەبىنىڭ ديرەكتورى، كيكبوكسينگتەن الەم كۋبوگىنىڭ يەگەرى ەلمۇرات قايىپجانوۆ.
قازاق كۇرەسى بەكزادا سپورت. باسقا كۇرەس تۇرلەرىنە قاراعاندا ارتىقشىلىعى باسىم. نۇرا اۋىلىنداعى تۋرنيردە بالدىرعان بالۋاندار قازاق كۇرەسىنىڭ كەرەمەت ءادىس، تاسىلدەرىن پاش ەتىپ، جارىستى تاماشالاۋعا جينالعان كوپشىلىكتى ءتانتى ەتتى.
- الماتى وبلىسىنىڭ قۇرمەتتى ازاماتى ساعىنىش ەسبەرگەنۇلىنىڭ ەسىمىن ارداقتاۋ ماقساتىنداعى ءداستۇرلى تۋرنير كەلەر جىلى دا جالعاسىن تابادى، - دەيدى ۇيىمداستىرۋشىلار.
وبلىستىڭ اشىق بىرىنشىلىگىندە توپ جارىپ جەڭىسكە جەتكەن بالۋاندارعا س. ەسبەرگەنوۆتىڭ بالالارى، نەمەرەلەرىنىڭ ارنايى تاپسىرىسپەن جاساتقان مەدال، ديپلوم، باعالى سىيلىقتارى بەرىلدى.
قۋانىش ەسىمباي،
فوتو سەرجان جيرەنباەۆ،
ەڭبەكشىقازاق اۋدانى،
نۇرا اۋىلى.
