Qazaq kúresiniń bekzadalyǵyn pash etken týrnır

1576

Almaty oblysy, Eńbekshiqazaq aýdanynda Nura degen yntymaǵy uıyǵan aýyl bar. Qulja turassasynyń boıyndaǵy osy aýyldyń irgetasyn qalap, keregesin keńeıtken —Esbergenuly Saǵynysh degen kisi. Taqyr jerden taý turǵyzbasa da, baqsha, baýǵa toly aýyl salǵan qaıratker. Artyna óshpes iz qaldyryp, ónegeli ómir súrgen Saǵynysh Esbergenulynyń esimin aýyldastary qashanda qurmetteıdi. Saǵynysh Esbergenulynyń atynda qazaq kúresinen jyl saıyn  dástúrli týrnır ótedi. Jetkinshek balýandardyń qyzyqqa toly  oblystyq ashyq týrnıri bıyl da jalaýyn jelbiretti.

2009-2012 jyly týǵan jasóspirimder arasyndaǵy týrnırge elimizdiń ár aımaǵynan talapty da, talantty balýan balalar qatysty.

- Mundaı jarystardyń kóbirek uıymdastyrylǵany jetkinshekterdiń shyńdalýyna orasan múmkindik beredi. Kezinde ózimiz de osy týrnırge qatysyp, qanattandyq. Jarysqa jan-jaqtan jınalǵan balýandardyń beldesýin kórip kóńilimiz ósti. Qazaq kúresiniń qanat jaıyp, keńinen taralýyna osyndaı jarystardy jıi ótkizýdiń tıgizer septigi mol, - deıdi týrnırdi uıymdastyrý alqasynyń tóraǵasy, Shelek aýylyndaǵy №2 balalar men jasóspirimder sport mektebiniń dırektory, kıkboksıngten álem kýbogynyń ıegeri Elmurat Qaıypjanov.

Qazaq kúresi bekzada sport. Basqa kúres túrlerine qaraǵanda artyqshylyǵy basym. Nura aýylyndaǵy týrnırde baldyrǵan balýandar qazaq kúresiniń keremet ádis, tásilderin pash etip, jarysty tamashalaýǵa jınalǵan kópshilikti tánti etti.

- Almaty oblysynyń Qurmetti azamaty Saǵynysh Esbergenulynyń esimin ardaqtaý maqsatyndaǵy dástúrli  týrnır keler jyly da jalǵasyn tabady, - deıdi uıymdastyrýshylar.

Oblystyń ashyq birinshiliginde top jaryp jeńiske jetken balýandarǵa S. Esbergenovtyń balalary, nemereleriniń arnaıy tapsyryspen jasatqan medal, dıplom, baǵaly syılyqtary berildi.

Qýanysh Esimbaı,

Foto Serjan Jırenbaev,

Eńbekshiqazaq aýdany,

Nura aýyly.

Pikirler
Redakııa tańdaýy