نۇرسۇلتان نازارباەۆ پرەزيدەنتتىك بيلىكتەن باس تارتار كەزدە ساياسي جۇيەدەگى ءوز ىقپالىن كەزەڭ كەزەڭمەن بوساتۋدى تەرەڭ جوسپارلاعان بولسا كەرەك. بۇگىن جەتەكشى «NurOtan» پارتياسى كەڭەيتىلگەن ساياسي كەڭەسىندەگى پارتيا توراعاسىنىڭ جاريالاعان ءسوزىن وقي وتىرىپ وسىنداي ويعا كەلدىم.
ەڭ ءبىرىنشى ەلەڭ ەتكىزگەن جاڭالىق ارينە، پارتياداعى توراعالىقتى قاسىم-جومارت توقاەۆقا وتكىزۋ تۋرالى شەشىم. بۇل شەشىم پارتيانىڭ ساياسي جۇيەدەگى الاتىن ورنىن ەسكەرە وتىرىپ، ساياسي ءترانزيتتىڭ ماڭىزدى قادامى دەپ باعالاۋعا بولادى. پارتيا توراعاسىنىڭ بۇل شەشىمىن كوپشىلىك ءدال قازىر كۇتپەسە كەرەك. دەگەنمەن بۇل شەشىم پارتيالىق جاڭعىرۋعا ودان ءارى باتىل جۇرگىزۋگە جاسالعان قادام دەپ باعالاۋعا بولادى.
ەلباسى بۇگىندە «Nur Otan» - ەلىمىزدىڭ باستى ساياسي كۇشى ەكەنىن تاعى ەسكە سالدى. «حالىقارالىق تاجىريبە قۋاتتى مەملەكەت پەن دامىعان ازاماتتىق قوعامنىڭ قالىپتاسۋى ءۇشىن ەلدىڭ العا قاراي تۇراقتى قوزعالىسىنىڭ 40-50 جىلى قاجەت ەكەنىن ايعاقتايدى. بۇل كوپتەگەن ەلدەردەگى بيلەۋشى ساياسي پارتيالاردىڭ ۇزاق مەرزىمدى كوشباسشىلىعى، بۇل ساتتىلىك پەن الەۋمەتتىك-ەكونوميكالىق ءوسۋدىڭ شارتى بولدى» دەپ اتاپ ءوتتى نۇرسۇلتان نازارباەۆ.
ءبىزدىڭ ساياسي جۇيەنىڭ باستى ماقساتى - الەمنىڭ ەڭ دامىعان 30 ەلىنىڭ قاتارىنا كىرۋ. بۇل جوسپار «قازاقستان-2050» ستراتەگياسىندا بەلگىلەنگەن. بۇل ماقساتقا جەتۋدەگى ەرەكشە ءرول «Nur Otan» - عا جۇكتەلگەن.
پارتيانىڭ قازىرگى توراعاسى پارتيا ءوز جۇمىسىندا 5 نەگىزگى ءپرينتسيپتى ۇستانۋى كەرەك ەكەنىن ايتتى:
1.ءاردايىم ۋاقىتپەن بىرگە ءجۇرۋ. الەمگە كىرگەن وزگەرىستەر ءداۋىرى ءبىزدىڭ قوعامدا كورىنىس تابادى. پارتيا ۇنەمى جاڭارىپ وتىرۋى، زاماناۋي جانە ۇتقىر بولۋى، وزگەرىستەر اياسىندا قالۋى ءتيىس.
2.ارقاشان حالىقتىڭ مۇددەسىن ەسكەرۋ.حالىقتىڭ ناقتى ماسەلەلەرىن شەشە وتىرىپ، پارتيا بۇكىل ەلدىڭ دامۋىنا ىقپال ەتۋ.
3.پارتيا ايقىن ماقساتتار مەن ولارعا قول جەتكىزۋدىڭ ناقتى جولدارىن ايتۋى ءتيىس.بارلىق ايتىلعان جاسالۋى ءتيىس. پارتيا ارقاشان سايلاۋالدى ۋادەلەرىن جۇزەگە اسىرۋدى قامتاماسىز ەتۋى كەرەك.
4.پارتيا ءوزىنىڭ ماقساتتارىنا جۇمىلا جۇمىلعان جانە ءبىرتۇتاس كوماندامەن جەتۋگە ءتيىس.
5.«Nur Otan» - قوعامدى بۇكىل حالىق ءۇشىن ىرگەلى بولىپ تابىلاتىن پارتيا قۇندىلىقتارىنىڭ اينالاسىنا توپتاستىرۋ كەرەك.
نازارباەۆ ءۇشىن بىرىكتىرۋشى يدەيا - بۇل قازاقستاننىڭ گۇلدەنۋى مەن ازاماتتاردىڭ ءال-اۋقاتىن ارتتىرۋ.
ەلباسى ەلىمىزدىڭ ءوز تاۋەلسىزدىكتىڭ وتىز جىلدىعىن ايتۋلى جەتىستىكتەرمەن قارسى الىپ وتىرعانىن ەرەكشە ايتىپ ءوتتى:
وتىز جىلدا مۇلدەم جاڭا بۋىن قالىپتاستى. 9,5 ميلليوننان استام ءسابي دۇنيەگە كەلدى. بۇل حالقىمىزدىڭ جارتىسىن قۇرايدى. جاڭا ۇرپاقتا مۇلدەم جاڭا دۇنيەتانىم قالىپتاسۋدا. نۇرسۇلتان نازارباەۆ جاڭا ۇرپاقتىڭ ەڭ باستى ميسسياسى – مەملەكەتتىكتى ساقتاۋ، قازاقستاندى «ماڭگىلىك ەل» ەتۋ.
وسى ورايدا ەلباسى جاڭا داۋىردەگى قازاقستاندىقتارعا باعدار بولاتىن «ەلدىكتىڭ جەتى تۇعىرى» اتتى قاعيداتتار جيىنتىعىن ۇسىندى:
ەكىنشى قۇندىلىق -بىرلىك پەن كەلىسىم – ەلدىگىمىزدىڭ مىزعىماس تۇعىرى. بۇگىندە بىرلىك پەن ەتنوسارالىق تاتۋلىقتى ساقتاۋ ءبىر شاڭىراقتىڭ استىندا تاتۋ-ءتاتتى عۇمىر كەشىپ، تاتۋلىق پەن سىيلاستىقتى قامتاماسىز ەتۋدىڭ ماڭىزدىلىعىنا توقتالدى.
ءۇشىنشى - جەر – اتا-بابا مۇراسى، حالىق قازىناسى. قازاق ءۇشىن جەردەن قاسيەتتى ەشنارسە جوق. تاريحىمىزداعى سوعىس اتاۋلىنىڭ ءبارى ەل مەن جەردى قورعاۋ ءۇشىن بولعان. 13 مىڭنان استام شاقىرىم شەكارانى بەكىتۋ وڭاي بولماعانىن بىلەمىز. جەر اتا-بابا اماناتى.
ءتورتىنشى تۇعىر - وتباسى مەن سالت-ءداستۇر – قوعامنىڭ التىن دىڭگەگى. وتانعا دەگەن سۇيىسپەنشىلىك – ءوز وتباسىڭا، اۋىل-ايماعىڭا، ەلىڭە دەگەن ماحاببات پەن جاناشىرلىقتان باستالادى.
بەسىنشى قۇندىلىق - ۇلتتىق مادەنيەت – حالىقتىڭ رۋحاني تىرەگى. قازىرگى تاڭدا جاھاندىق باسەكەگە قابىلەتتى بولۋ ءۇشىن بىرەگەي ۇلتتىق مىنەز، اسقاق رۋح كەرەك. مۇنداي قاسيەتتەر تاريحتى ءبىلۋ، مادەني قۇندىلىقتاردى تانۋ ارقىلى كەلەدى.
التىنشى - ءبىلىم مەن ەڭبەك – باقۋاتتى ءومىردىڭ كىلتى. «وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ» دەپ دانا اباي ايتقانداي، ءبىز تەك ءوز ءبىلىمىمىز بەن كۇشىمىزگە سەنۋىمىز كەرەك.
جەتىنشى - پراگماتيزم – باسەكەگە قابىلەتتى بولۋدىڭ كەپىلى.
ەلباسى ۇسىنعان پارتيالىق 7 قۇندىلىق «ماڭگىلىك ەل» ۇلتتىق يدەياسىنا نەگىزدەلگەن دەپ ايتا الامىز. بۇل قۇندىلىقتار پارتيالىقتارعا عانا ەمەس، ءاربىر قازاقستاندىققا تۇسىنىكتى جانە جاقىن يدەيالارعا نەگىزدەلگەن - ادام، بوستاندىق، زاڭنىڭ ۇستەمدىگى، ادىلەتتىلىك، ىنتىماقتاستىق، بولاشاققا ۇمتىلۋ، وتباسى جانە داستۇرلەر.
بۇل قۇندىلىقتار ەلباسىنىڭ ايتۋىنشا «Nur Otan» ورتالىق پلاتفورماسىنىڭ جانە قازاقستانعا 30 جىلدىق جولدى كۇيزەلىسسىز وتۋگە مۇمكىندىك بەرگەن ءبىزدىڭ مەملەكەتتىك باعىتىنىڭ نەگىزىن قۇرايدى. وسى قۇندىلىقتار ەندىگى كەلەر وتىز جىلدىقتاردا قوعامعا باعدار بولاتىن ۇستانىمدار. ەلدىكتىڭ جەتى تۇعىرى وتىز جىلدىق ساياسي تاجىريبەدەن تۋىنداعان جانە ايقىندالعان باسىمدىقتارعا نەگىزدەلگەن. سونىمەن بىرگە بۇل تۇعىرلار الەمدىك تاجىريبەدەگى جاڭا مەملەكەتتەردىڭ نەگىزىن قالاعان مۇستافا كەمال، دجودج ۆاشينگتون، لي كۋان يۋ سەكىلدى تۇلعالار مەملەكەتشىلدىك ۇستانىمدارىنا سايكەس كەلەدى.
نۇرسۇلتان نازارباەۆ ءوزىنىڭ 2007 جىلى شىققان «قازاقستان جولى» دەگەن ستراتەگيالىق كىتابىنىڭ كىرىسپەسىندە «...بۇل جەردە بوساڭدىققا سالىنۋعا استە دە بولمايدى، ەڭ باستىسى – العا ۇنەمى ۇمتىلۋ. ءتىپتى، بەينەلەپ ايتقاندا چەمپيوننىڭ مىندەتى تەك «التىندى» جەڭىپ الۋ عانا ەمەس، سونىمەن بىرگە ءوزىنىڭ كوشباسشىلىق قالپىن ۇستاپ تۇرا بىلۋىندە. ال بۇل ءوزىڭنىڭ الدىڭا جاڭا، كۇردەلى جانە بيىك ماقساتتار ۇنەمى قويىپ وتىرعاندا عانا مۇمكىن بولماق...» دەپ جازعان بولاتىن. بۇگىنگى كۇنگى ايتىلعان ەلدىكتىڭ تۇعىرى تۋرالى ويلارى - الدىڭعى ۇرپاق ءۇشىن امانات.
ەلباسى ءوزىنىڭ كوشباسشىلىق ميسسياسىن ساقتاي وتىرىپ, ساياسي ىقپالىن كەزەڭ كەزەڭمەن سەنىپ تاپسىرۋى لوگيكالىق ويلاستىرىلعان قادامدار دەپ ويلايمىن. بارلىعىنىڭ تەرەڭ جوسپارمەن نەگىزدەلگەن، وزىندىك ءمانى بار ارەكەتتەر. پرەزيدەنتتىك ترانزيت ەندى پارتيالىق ترانزيتكە ۇلاستى. بۇل پارتيانىڭ ۇزاق مەرزىمدى ستراتەگيالىق جوسپارىنا سايكەس كەلەدى.
تۇڭعىش پرەزيدەنت الداعى 30 جىل – ەلدىگىمىزدى نىعايتۋدىڭ جاڭا كەزەڭى بولاتىنا ۇلكەن سەنىممەن قارايدى. ول ءۇشىن ءار ازامات ۇلتىمىزدىڭ بولاشاعى ءۇشىن جاۋاپكەرشىلىكتى ءوز موينىنا الىپ، ونى تولىق سەزىنە بىلگەن كەزدە جۇزەگە اسادى دەگەن ويمەن قورىتىندىلايدى.
نۇرسۇلتان نازارباەۆقا زامانداستارىنىڭ بەرگەن باعاسى قانشا دەگەنمەن سۋبەكتيۆتى كورىنەتىنى ءسوزسىز. ەل تاريحىندا «قاسىم حاننىڭ قاسقا جولى» نەمەسە «ابىلايدىڭ اق جولىنداي»، «نازارباەۆ ۇلگىسىنىڭ» ءوزىنىڭ ءتيىستى باعاسىن الاتىنى ءسوزسىز. تاريح بارلىعىنا تورەشى.
ەلدوس جۇماعۇلوۆ، ساياساتتانۋشى
