«قازاقستان اتوم ەلەكتر ستانتسيالارى» اق باس ديرەكتورى تيمۋر جانتيكين «ينتەرفاكس-قازاقستان» اگەنتتىگىنە بەرگەن سۇحباتىندا ەلىمىز ءۇشىن اەس-ءتىڭ قاي مودەلى ەڭ قولايلى، بولاشاقتا اەس قازاقستاننىڭ قاي وڭىرىندە ورنالاسۋى ءتيىس سىندى سۇراقتارعا قاتىستى ءوز ويىن ءبىلدىردى، دەپ حابارلايدى "ادىرنا" ۇلتتىق پورتالى.
- بىرىنشىدەن، قازاقستاندا بازالىق قۋاتتاردى دامىتۋ، ەكىنشىدەن، گەنەراتسيالاردى ءارتاراپتاندىرۋ قاجەت، ويتكەنى قازىرگى ۋاقىتتا ەلدە كومىر گەنەراتسياسى باسىم. مەن تۇسىندىرەمىن: ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن گەنەراتسيانى تولىعىمەن ءارتاراپتاندىرۋ قاجەت جانە تيىسىنشە ءبىز اتوم ەنەرگەتيكاسىن قاراستىرىپ جاتىرمىز، ويتكەنى قازاقستاندا ۋران ءوندىرۋ، ۋران ءونىمىن قايتا وڭدەۋ جانە يادرولىق وتىن ءوندىرىسى سياقتى ۇلكەن قور بار. ياعني، مۇنىڭ بارلىعى قازاقستاننىڭ ءوز اتوم ستانتسياسىن سالۋىنا اكەلەدى، - دەيدى جانتيكين.
سونداي-اق ول بولاشاقتا اەس قازاقستاننىڭ قاي وڭىرىندە ورنالاسۋى ءتيىس ەكەنىنە ەرەكشە توقتالىپ ءوتتى.
- تاعى ءبىر ماڭىزدى ءسات. قازاقستاننىڭ وڭتۇستىگىندە 2030 جىلعا قاراي بازالىق قۋات تاپشىلىعى بولجانۋدا. ءبىزدىڭ باعالاۋىمىز بويىنشا، شامامەن 2,7 گۆت. سايكەسىنشە، ەلىمىزدىڭ وڭتۇستىگىندەگى تاپشىلىقتى جابۋ ءۇشىن اتوم ەلەكتر ستانتسياسى قاجەت، دەپ مالىمدەدى «قازاقستان اتوم ەلەكتر ستانتسيالارى» اق باس ديرەكتورى تيمۋر جانتيكين.
ايتا كەتەيىك، قازاقستاندا اەس-ءتى سالۋ ماسەلەسى بىرنەشە جىلدان بەرى ايتىلىپ كەلەدى. سايكەس جوبانى جۇزەگە اسىرۋعا بىرنەشە رەت تالپىنىس جاسالدى، بىراق بۇل جوسپارلار ەشقاشان جۇزەگە اسپادى. جاقىندا مەملەكەت باسشىسى قاسىم-جومارت توقاەۆ ەلدە اتوم ەلەكتر ستانساسىن سالۋ تۋرالى شەشىم قانشالىقتى ۇنامسىز بولسا دا، ءبارىبىر قابىلدانۋى كەرەك ەكەنىن مالىمدەگەن بولاتىن.
"ادىرنا" ۇلتتىق پورتالى
