ماڭعىستاۋ وبلىسىندا 120 دومبىراشى ابايدىڭ شىعارمالارىن ورىندادى

2457
Adyrna.kz Telegram

قر تۇڭعىش پرەزيدەنت كۇنى قارساڭىندا اقتاۋ قالاسىنداعى نازارباەۆ زياتكەرلىك مەكتەبىنىڭ 100 وقۋشىسى ماڭعىستاۋ وبلىستىق ق.سىديىقوۆ اتىنداعى وبلىستىق كىتاپحانادا «ۇلى دالا مۇراگەرلەرى» دومبىراشىلار فلەشموبىن وتكىزدى. ءداستۇرلى شارادا زياتكەرلەر ۇلى اقىن ابايدىڭ شىعارمالارى مەن حالىق كۇيلەرىن ورىندادى.

شارانىڭ باستى ماقساتى – قر تاۋەلسىزدىگىنىڭ 30 جىلدىعىن ۇلىقتاۋ، بابالار رۋحىنا شىعارمالار ارقىلى تاعزىم ەتۋ. سونداي-اق بيىلعى وقۋ جىلىندا مەكتەپ قابىرعاسىن اتتاعان زياتكەرلىك مەكتەپتىڭ 120 وقۋشىسىنىڭ مۇمكىندىكتەرىن كورسەتۋ، ۇلتتىق تاربيەگە باۋلۋ.

- اقتاۋداعى نازارباەۆ زياتكەرلىك مەكتەپ قابىرعاسىن اتتاعان ءاربىر 7-سىنىپ وقۋشىسى مىندەتتى دومبىرا ۇيرەنۋ ساباعىنا قاتىسادى. بۇگىن ونەر كورسەتكەن بالالاردىڭ دەنى قىركۇيەك ايىنان باستاپ قولىنا العاش دومبىرا ۇستاعان. ولارعا ارنايى ۋاقىت ءبولىنىپ، مىندەتتى ساباق جۇرگىزىلەدى. بۇل باستامامىز اتا-انالار تالاپىنان دا قولداۋ تاپقانىنا قۋانىشتىمىز،- دەيدى «قوس پەرنە» دومبىرا ۇيىرمەسىنىڭ جەتەكشىسى گۇلسىم تاجماعامبەتوۆا.

قالا تۇرعىندارىنا ارنالعان شارا بارىسىندا جاس دومبىراشىلار الدىمەن قۇرمانعازى ساعىربايۇلىنىڭ «بالبىراۋىن» كۇيىن ورىنداسا، كەيىن «ءنار اعاشى»، «كەربەز سۇلۋ» كۇيلەرىن ناقىشىنا كەلتىرىپ ورىندادى. فلەشموبتىڭ ەكىنشى ءبولىمى اباي قۇنانباەۆتىڭ «كوزىمنىڭ قاراسى»، «جەلسىز تۇندە جارىق اي» تۋىندىسىمەن جالعاستى.

- مەن دومبىرادا ويناۋدى قىركۇيەك ايىنان ۇيرەنە باستادىم. بىزگە جەتەكشىمىز اپتا سايىن ساباق وتكىزىپ، قولىمىزدى جاتتىقتىردى. قازاقستاننىڭ جاستارى تاۋەلسىز، ەركىن ەلدە، جان جاقتى، ءبىلىمدى، دارىندى بولىپ ءوسىپ كەلە جاتقانىن كورسەتەتىن شاراعا قاتىسقانىما قۋانىشتىمىن. بۇگىنگى شارانى تەۋەلسىزدىككە جەتكىزگەن تۇلعالارعا ارنايمىز، - دەيدى 7-سىنىپ وقۋشىسى ءبيبىنۇر بوشمان.

 

«ادىرنا» ۇلتتىق پورتالى

پىكىرلەر