ەرتىس-بايان ءوڭىرىن ەكى كۇن بويى جىرعا بولەگەن وبلىستىق الامان ايتىس مارەسىنە جەتتى. بۇل ايماقتا مۇنداي ەرەكشە ايتىس بۇرىن-سوڭدى بولماعان ەدى. ەرەكشەلىگى سول، جىر دوداسىندا وبلىستىڭ ۇلكەن-كىشى بارلىق دەرلىك اقىنى قاتىستى. ەل تاۋەلسىزدىگىنىڭ 30 جىلدىعىنا ارنالعان ايتىس الامانىنا وتىزعا جۋىق اقىن ءتۇستى. ولاردىڭ ەڭ جاسى 18-دە بولسا، ەڭ ۇلكەنى 73 جاستاعى ارداگەر ايتىسكەرلەر.تاعى ءبىر ەرەكشەلىگى – قوماقتى جۇلدە قورىندا.
اعىمداعى ايدىڭ 3-4 كۇندەرى پاۆلودار وبلىسىنىڭ اكىمدىگى، وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسى، «شاڭىراق» حالىق شىعارماشىلىعى ورتالىعىنىڭ ۇيىمداستىرۋىمەن «تاۋەلسىزدىككە تاعزىم» اتتى اقىندار ايتىسى ءوتتى. ايماقتىڭ ءار قالا، اۋدانىنان كەلگەن 28 اقىن قاتىستى. ولارعا ارنايى شاقىرىلعان قۇرمەتتى مەيماندار، حالىقارالىق «الاش» ادەبي سىيلىعىنىڭ لاۋرەاتى، «قۇرمەت» وردەنىنىڭ، «ەرەن ەڭبەگى ءۇشىن» مەدالىنىڭ يەگەرى عالىم جايلىباي، ل.ن.گۋميلەۆ اتىنداعى ەنۋ-دىڭ پروفەسسورى، تالاي رەسپۋبليكالىق، حالىقارالىق ايتىستاردىڭ جەڭىمپازى امانجول التاەۆ باستاعان قازىلار تورەلىك ەتتى.
- اتى وبلىستىق بولعانىمەن، دەڭگەيى رەسپۋبليكالىق، حالىقارالىق ايتىسقا تەڭ بولدى. جەرگىلىكتى جۇرتشىلىقتىڭ ايتىسقا سۋسىنداپ قالعانىن دا كورىپ وتىرمىز. تالاي تەكتىلەردىڭ كىندىگىن كەسكەن، بەسىگىن تەربەتكەن كيەلى مەكەننىڭ كورەرمەندەرىنىڭ ىقىلاسىنا، ادال كوڭىلىنە دە ريزا بولدىم. اقىنداردىڭ دەڭگەيى دە وتە جوعارى. قاي-قايسىسى بولسا دا ۇلكەن الامانعا شىعارۋعا لايىقتى، - دەدى قازىلار القاسىنىڭ توراعاسى عالىم جايلىباي.
الەمدى جايلاعان پاندەمياعا بايلانىستى ادەبيەتىمىزدىڭ اقبەرەن جانرى، بەكزات ونەرىمىز ايتىستان دا ءبىراز ۋاقىت قول ءۇزىپ قالعانىمىز بەلگىلى. راسىمەن، ەكى كۇن بويى ايتىس وتكەن قاراشاڭىراق، ج.ايماۋىتوۆ اتىنداعى وبلىستىق قازاق تەاترىنىڭ كورەرمەندەر وتىراتىن زالىنىڭ تولى بولعانىن، جۇرتشىلىقتىڭ ساعاتتاپ تاپجىلماي، اقىندارعا شابىت بەرىپ وتىرعانىن كوز كوردى. اقىندار دا ايانىپ قالمادى.
«التىن دومبىرا» يەگەرى اسپانبەك شۇعاتاەۆ، ەلىمىزگە بەلگىلى ايتىسكەرلەر راۋان قايداروۆ، قۋانىشبەك شارمانوۆتار جاسىنداي جارقىلدادى. وتتى جىرىمەن كورەرمەننىڭ ەرەكشە ىقىلاسىنا بولەنگەن ابزال قابدراش، قوبىزدىڭ سارىنىمەن بىردە كۇڭىرەنتىپ، بىردە جادىراتقان بوكەن جىگەر، تۇيدەك-تۇيدەك ويلارىمەن، تەرەڭ تولعاۋلارىمەن ميزان ءجۇمالى، قايروللا حافيز، ورازبەك ساياحات سياقتى جاستار ايتىستىڭ جاڭالىعى بولدى. بۇل رەتتە، ايماقتا ايتىس ونەرىنىڭ وركەندەۋىنە ولشەۋسىز ۇلەس قوسىپ، تالاي اقىندى باپتاپ شىعارعان بەلگىلى اقىن، «جەلدىرمە» اقىندار مەكتەبىنىڭ جەتەكشىسى اسىعات تۇرعانبەكتىڭ ەڭبەگى وراسان. مۇنى وبلىس اكىمى ابىلقايىر سقاقوۆ تا ەرەكشە اتاپ ءوتتى.
- تاۋەلسىزدىكتىڭ تورقالى تويىنا وراي الامان ايتىستىڭ ءوتۋى يگى ءداستۇر دەپ بىلەمىن. ەل ەگەمەندىك العان 30 جىلدىڭ ىشىندە وڭىرىمىزدە ايتىس اقىندارىنىڭ ۇلكەن شوعىرى قالىپتاستى. بۇل رەتتە، جەرگىلىكتى «جەلدىرمە» اقىندار مەكتەبىنىڭ ۇلەسى زور. ەلدىڭ ءسوزىن سويلەۋ، كۇرمەۋلى ماسەلەلەردى ونەر تىلىمەن جەتكىزۋ جاۋاپكەرشىلىگى زور ءىس. اقىندارىمىز ابىروي بيىگىنەن تۇسپەسىن. تاۋەلسىزدىگىمىز تۇعىرلى بولسىن، - دەدى ايماق باسشىسى.
قازىلار القاسىنىڭ شەشىمىمەن وبلىستىق الامان ايتىستىڭ باس جۇلدەسى جانە 2 ملن تەڭگە سىياقى اسپانبەك شۇعاتاەۆقا بۇيىردى. ءبىرىنشى ورىنعا تاعايىندالعان 1 ملن تەڭگە جاس تالانت ابزال قابدراشتىڭ ەنشىسىندە. ەكى ءىى-ءشى ورىندى قۋانىشبەك شارمانوۆ پەن راۋان قايداروۆ ۇلەستىرىپ الدى. ولاردىڭ ارقايسىسىنا 700 مىڭ تەڭگەنىڭ سەرتيفيكاتتارى تابىس ەتىلدى. ال ەكى ءىىى-ءشى ورىنعا ميزان ءجۇمالى مەن بوكەن جىگەر تۇراقتادى. جاس اقىندار 500 مىڭ تەڭگەلىك جۇلدەنى يەلەندى.
بۇدان بولەك بىرنەشە اقىنعا 150 مىڭ تەڭگە ارنايى جۇلدە، ءاربىر قاتىسقان اقىنعا 100 مىڭ تەڭگەدەن ۇلەستىرىلدى. بۇدان بولەك، كورەرمەندەر اراسىنان كاسىپكەر، مەتسەنات اسىلبەك تۋعانباي ەكى اقىن، ورازحبەك ساياحات پەن ايبەك ورالحانعا ارنايى قارجىلاي جۇلدە تابىستادى.
الامان جىر دوداسى اياسىندا ايماقتىڭ ايتىس ونەرىنىڭ ارداگەرلەرى بەيسەنبى مۇقاجان، جۇمكەن سەيىتوۆ، شولپان بايعالى، قانات شايعازين، بالتاباي سىزدىقوۆ وبلىستىق مادەنيەت باسقارماسىنىڭ العاش تاعايىنداعان «رۋحانيات» مەدالىمەن ماراپاتتالدى.
“ادىرنا” ۇلتتىق پورتالى
