Ertıs-Baian öŋırın ekı kün boiy jyrǧa bölegen oblystyq alaman aitys märesıne jettı. Būl aimaqta mūndai erekşe aitys būryn-soŋdy bolmaǧan edı. Erekşelıgı sol, jyr dodasynda oblystyŋ ülken-kışı barlyq derlık aqyny qatysty. El Täuelsızdıgınıŋ 30 jyldyǧyna arnalǧan aitys alamanyna otyzǧa juyq aqyn tüstı. Olardyŋ eŋ jasy 18-de bolsa, eŋ ülkenı 73 jastaǧy ardager aityskerler.Taǧy bır erekşelıgı – qomaqty jülde qorynda.
Aǧymdaǧy aidyŋ 3-4 künderı Pavlodar oblysynyŋ äkımdıgı, oblystyq mädeniet, tılderdı damytu jäne arhiv ısı basqarmasy, «Şaŋyraq» halyq şyǧarmaşylyǧy ortalyǧynyŋ ūiymdastyruymen «Täuelsızdıkke taǧzym» atty aqyndar aitysy öttı. Aimaqtyŋ är qala, audanynan kelgen 28 aqyn qatysty. Olarǧa arnaiy şaqyrylǧan qūrmettı meimandar, halyqaralyq «Alaş» ädebi syilyǧynyŋ laureaty, «Qūrmet» ordenınıŋ, «Eren eŋbegı üşın» medalınıŋ iegerı Ǧalym Jailybai, L.N.Gumilev atyndaǧy ENU-dyŋ professory, talai respublikalyq, halyqaralyq aitystardyŋ jeŋımpazy Amanjol Ältaev bastaǧan qazylar törelık ettı.
- Aty oblystyq bolǧanymen, deŋgeiı respublikalyq, halyqaralyq aitysqa teŋ boldy. Jergılıktı jūrtşylyqtyŋ aitysqa susyndap qalǧanyn da körıp otyrmyz. Talai tektılerdıŋ kındıgın kesken, besıgın terbetken kielı mekennıŋ körermenderınıŋ yqylasyna, adal köŋılıne de riza boldym. Aqyndardyŋ deŋgeiı de öte joǧary. Qai-qaisysy bolsa da ülken alamanǧa şyǧaruǧa laiyqty, - dedı qazylar alqasynyŋ töraǧasy Ǧalym Jailybai.
Älemdı jailaǧan pandemiiaǧa bailanysty ädebietımızdıŋ aqberen janry, bekzat önerımız aitystan da bıraz uaqyt qol üzıp qalǧanymyz belgılı. Rasymen, ekı kün boiy aitys ötken qaraşaŋyraq, J.Aimauytov atyndaǧy oblystyq qazaq teatrynyŋ körermender otyratyn zalynyŋ toly bolǧanyn, jūrtşylyqtyŋ saǧattap tapjylmai, aqyndarǧa şabyt berıp otyrǧanyn köz kördı. Aqyndar da aianyp qalmady.
«Altyn dombyra» iegerı Aspanbek Şūǧataev, elımızge belgılı aityskerler Rauan Qaidarov, Quanyşbek Şarmanovtar jasyndai jarqyldady. Otty jyrymen körermennıŋ erekşe yqylasyna bölengen Abzal Qabdraş, qobyzdyŋ sarynymen bırde küŋırentıp, bırde jadyratqan Böken Jıger, tüidek-tüidek oilarymen, tereŋ tolǧaularymen Mizan Jūmalı, Qairolla Hafiz, Orazbek Saiahat siiaqty jastar aitystyŋ jaŋalyǧy boldy. Būl rette, aimaqta aitys önerınıŋ örkendeuıne ölşeusız üles qosyp, talai aqyndy baptap şyǧarǧan belgılı aqyn, «Jeldırme» aqyndar mektebınıŋ jetekşısı Asyǧat Tūrǧanbektıŋ eŋbegı orasan. Mūny oblys äkımı Äbılqaiyr Sqaqov ta erekşe atap öttı.
- Täuelsızdıktıŋ torqaly toiyna orai alaman aitystyŋ ötuı igı dästür dep bılemın. El egemendık alǧan 30 jyldyŋ ışınde öŋırımızde aitys aqyndarynyŋ ülken şoǧyry qalyptasty. Būl rette, jergılıktı «Jeldırme» aqyndar mektebınıŋ ülesı zor. Eldıŋ sözın söileu, kürmeulı mäselelerdı öner tılımen jetkızu jauapkerşılıgı zor ıs. Aqyndarymyz abyroi biıgınen tüspesın. Täuelsızdıgımız tūǧyrly bolsyn, - dedı aimaq basşysy.
Qazylar alqasynyŋ şeşımımen oblystyq alaman aitystyŋ Bas jüldesı jäne 2 mln teŋge syiaqy Aspanbek Şūǧataevqa būiyrdy. Bırınşı orynǧa taǧaiyndalǧan 1 mln teŋge jas talant Abzal Qabdraştyŋ enşısınde. Ekı II-şı oryndy Quanyşbek Şarmanov pen Rauan qaidarov ülestırıp aldy. Olardyŋ ärqaisysyna 700 myŋ teŋgenıŋ sertifikattary tabys etıldı. Al ekı III-şı orynǧa Mizan Jūmalı men Böken Jıger tūraqtady. Jas aqyndar 500 myŋ teŋgelık jüldenı ielendı.
Būdan bölek bırneşe aqynǧa 150 myŋ teŋge arnaiy jülde, ärbır qatysqan aqynǧa 100 myŋ teŋgeden ülestırıldı. Būdan bölek, körermender arasynan käsıpker, mesenat Asylbek Tuǧanbai ekı aqyn, Orazhbek Saiahat pen Aibek Oralhanǧa arnaiy qarjylai jülde tabystady.
Alaman jyr dodasy aiasynda aimaqtyŋ aitys önerınıŋ ardagerlerı Beisenbı Mūqajan, Jūmken Seiıtov, Şolpan Baiǧaly, Qanat Şaiǧazin, Baltabai Syzdyqov oblystyq mädeniet basqarmasynyŋ alǧaş taǧaiyndaǧan «Ruhaniiat» medalımen marapattaldy.
“Adyrna” ūlttyq portaly
