ەلوردالىق ۇلاندىقتار كوپىردەن سەكىرگىسى كەلگەن جىگىتتى توقتاتتى

2464
Adyrna.kz Telegram

نۇر-سۇلتاندا ۇلاندىقتار كوپىردەن سەكىرمەك بولعان جىگىتتى قۇتقاردى. بۇل تۋرالى ىشكى ىستەر مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.

وقيعا 3 جەلتوقسان كۇنى كەشكى ساعات 21.30 شاماسىندا ورىن الدى. پاترۋلدىك-بەكەتتىك قىزمەت اتقارۋ بارىسىندا ۇلتتىق ۇلان 5573 اسكەري ءبولىمىنىڭ اسكەري قىزمەتشىلەرى ءوز ەركىمەن ومىرىمەن قوشتاسقىسى كەلگەن جىگىتتىڭ ارەكەتىنە توسقاۋىل قويدى. ەر جىگىت ەسىل وزەنىندەگى كوپىردەن سەكىرگىسى كەلگەن.
قوعامدىق ءتارتىپتى قامتاماسىز ەتۋ بويىنشا قىزمەت اتقارۋ بارىسىندا اسكەري جاساق باستىعى قاتارداعى حاكىمجان سارباسوۆ جانە پاترۋلشىلەر ماكسيم ريۋمينا جانە رولاند اراپيەۆپەن بىرگە وزەن بويىن جاعالاپ كەلە جاتىپ، سارىارقا كوشەسىندەگى كوپىردەن ء“ومىر سۇرگىم كەلمەيدى، ولگىم كەلەدى” دەگەن جىگىتتىڭ داۋىسىن ەستيدى.

– كوپىردەن سەكىرگىسى كەلگەن جىگىتتى كورىپ، ءبىز دەرەۋ وعان قاراي اسىقتىق. ەر ازامات “Radisson” قوناق ءۇيىنىڭ قاسىنداعى كوپىردە تۇردى. وسى ۋاقىتتا ول قورشاۋدىڭ ارعى جاعىنا ءوتىپ ۇلگەردى. جاس جىگىت كوپىردەن سەكىرىپ، سۋيتسيد جاساعىسى كەلدى، – دەيدى ۇلاندىق جاۋىنگەر حاكىمجان سارباسوۆ.

اسكەري قىزمەتشىلەر ازاماتپەن سويلەسىپ، ونى بۇل ويىنان باس تارتۋعا شاقىردى. وسى ساتتە ءوتىپ بارا جاتقان باسقا دا تۇرعىندار ازاماتتىڭ وقىس قىلىق جاساماۋىن ءوتىندى. كەيىن ۇتىمدى ءساتتى پايدالانا وتىرىپ، اسكەريلەر مەن ازاماتتار قىل ۇستىندە تۇرعان جىگىتتى كوپىردىڭ ارعى جاعىنان الىپ شىقتى. بۇدان سوڭ ونى جۇباتىپ، اسكەري جاساقتار بويىنشا كەزەكشىگە تاپسىردى.
2003 جىلعى ازامات ءارى قاراي ءمان-جايدى انىقتاۋ ءۇشىن سارىارقا اۋدانىنىڭ پوليتسيا باسقارماسىنا جەتكىزىلدى.

پىكىرلەر