اقتاۋلىق مۇعالىم شاكىرتىمەن بىرگە "انتيۆيرۋس تەرمينالى" قۇرىلعىسىن ويلاپ تاپتى

1943
Adyrna.kz Telegram

اقتاۋداعى ف.وڭعارسىنوۆا اتىنداعى №29 ورتا مەكتەبىنىڭ كوركەم ەڭبەك ءپانى جانە روبوتوتەحنيكا ۇيىرمەسىنىڭ مۇعالىمى مارات اتانازاروۆ وقۋشىسى جاسۇلان شاڭىتبايمەن "انتيۆيرۋس تەرمينالى" قۇرىلعىسىن ويلاپ تاپتى، دەپ حابارلايدى "ادىرنا" ۇلتتىق پورتالى.

اقتاۋ قالاسى اكىمىنىڭ ءباسپاسوز قىزمەتى مالىمدەگەندەي، قازىرگى تاڭدا جاڭا قۇرىلعى اتالعان مەكتەپكە ورناتىلىپ، سىناقتان وتكىزىلۋدە.

"انتيۆيرۋس تەرمينالى", ەڭ الدىمەن، ادامنىڭ دەنە قىزۋىن ولشەپ، قولدى اۆتوماتتى تۇردە ۋلترادىبىستىق داتچيك ارقىلى زالالسىزداندىرادى. ارنايى تەتىكتەر ارقىلى بالالار مەن ەرەسەكتەر ءۇشىن بەتپەردە الۋ مۇمكىندىگى دە قاراستىرىلىپ، مۇندا "Ashyk" قوسىمشاسى ورنالاتىلعان.

— قازىرگى تاڭدا بەلەڭ العان كوروناۆيرۋس پاندەمياسىنان قۇتىلۋدىڭ بىردەن ءبىر جولى بەتپەردە تاعىپ، قولىمىزدى انتيسەپتيكپەن زالالسىزداندىرىپ، ادامدارمەن قارىم-قاتىناستى ازايتۋ دەپ دارىگەرلەر ەسكەرتىپ جاتىر. وسىنداي تەرمينال بارلىق ءبىلىم وشاقتارى مەن بالاباقشالاردا، قوعامدىق ورىندارىندا تۇرسا، ىندەتتەن تەزىرەك ارىلۋعا از دا بولسا سەپتىگىن تيگىزەدى دەپ سەنەمىن،- دەيدى مارات اتانازاروۆ.

تەرمينال ادام كوپ شوعىرلاناتىن ورىندارعا قويۋعا ارنالعان. باستى ارتىقشىلىعى - اۆتوماتتاندىرىلعان. قۇرىلعىنى قاشىقتان باقىلاپ، كۇتىپ- ۇستاۋ ماقساتىندا ارنايى بەينەكامەرا ورناتىلعان.

ونەرتاپقىشتار جۋىردا وتكەن "دارىن" عىلىمي جوبالار بايقاۋىنىڭ وبلىستىق كەزەڭىنەن 1- ءشى ورىن يەلەنىپ، رەسپۋبليكالىق كەزەڭىنە جولداما الدى.

 

"ادىرنا" ۇلتتىق پورتالى.

پىكىرلەر