مەديتسينا سالاسىنا ءتۇسىپ جاتقان اۋىرتپالىق ەسەلەي تۇسكەندىگى بەلگىلى. دەرتكە توقتام سالار تۇستا دارىگەرلەرىمىزگە كومەك پەن قولداۋ كورسەتۋىمىز ماڭىزدى. اسىرەسە، ىندەتپەن كۇرەسۋدە تىڭ ءادىس، ءتيىمدى تاسىلدەر جونىندە ماماندار بەرەتىن كەڭەستىڭ ورنى بولەك.
شىمكەنت قالاسىنا جۇمىس ساپارىمەن كەلگەن ەلىمىزدىڭ دەنساۋلىق ساقتاۋ ءمينيسترى الەكسەي تسويمەن وتكەن كەزدەسۋدە شىمكەنتتىك دارىگەرلەر ادىستەمەلىك كومەك الدى.
مينيستر جەدەل جاردەم ستانساسىنىڭ قىزمەتكەرلەرىمەن، بىرقاتار ەمحانالاردىڭ دارىگەرلەرىمەن كەزدەسۋلەر وتكىزدى.
ونىڭ ساپارى الدىندا شىمكەنتكە ءبىر توپ ماڭىزدى ماماندار كەلىپ، كوۆيدپەن كۇرەس بارىسىمەن تانىسىپ، جۇمىستى جەتىلدىرۋ بويىنشا ۇسىنىستار بەردى.
كەشە اكىمدىكتە كوميسسيانىڭ قورىتىندىسى بويىنشا كوروناۆيرۋسپەن كۇرەس جونىندەگى شتاب ءوتتى. شتابتا دەنساۋلىق ساقتاۋ ۆيتسە-ءمينيسترى اجار عيناياتقىزى ستاتسيونارلار مەن ەمحانالاردىڭ جۇمىسىن جەتىلدىرۋگە قاتىستى ناقتى ۇسىنىستار ايتتى. مەملەكەتتىك سانيتارلىق-ەپيدەميولوگيالىق قاداعالاۋ كوميتەتىنىڭ ءتورايىمى ايجان ەسماعامبەتوۆا ەپيداحۋالدى تۇراقتاندىرۋ بويىنشا قۇندى كەڭەستەر بەردى.
شىمكەنت قالاسىنىڭ باس دارىگەرلەرى دەنساۋلىق ءمينيسترى باستاپ كەلگەن مامانداردىڭ ساپارى قالانىڭ دەنساۋلىق جۇيەسى ءۇشىن وتە پايدالى بولعانىن ايتۋدا. بىلىكتى مامانداردان كەڭەستەر الۋ تاجىريبەسى الداعى ۋاقىتتا دا جالعاسىن تابادى.
