2007 جىلى ەلباسى – تۇڭعىش پرەزيدەنت ن.نازارباەۆتىڭ جارلىعىمەن ماڭعىستاۋدا جاڭا – مۇنايلى اۋدانى قۇرىلعانى بەلگىلى. بۇل – تاۋەلسىزدىك العاننان كەيىنگى ەلىمىزدە قۇرىلعان العاشقى اۋدان بولدى. العاشقى كەزدە اۋدان حالقىنىڭ سانى 53 مىڭ بولسا، قازىر مۇنايلىدا 174 مىڭنان استام ادام تۇرادى. وڭىردەگى ەڭ ءىرى جانە حالىق تىعىز ورنالاسقان اۋدانداردىڭ ءبىرى دە قازىر وسى اۋدان.
تاۋەلسىزدىك جىلدارى ىشىندە مۇنايلى اۋدانىنداعى پەداگوگتار سانى 7 ەسەگە ارتقان. ماسەلەن اۋدان قۇرىلعان 2007 جىلى 374 مۇعالىم عانا بولسا، بۇگىنگى تاڭدا ولاردىڭ سانى 2890-عا جەتىپ وتىر. اۋدان قۇرىلعان 14 جىل ىشىندە اۋدانداعى مەكتەپتەر سانى 5 ەسە ءوستى. قازىر اۋدان مۇعالىمدەرىنىڭ 80 پايىزى جوعارى ءبىلىمدى. سونداي-اق تاۋەلسىزدىك العان جىلدار ىشىندە 1554 مۇعالىم «ديپلوممەن اۋىلعا» باعدارلاماسى اياسىندا كوتەرمە جاردەماقى تاعايىندالسا، 627 مۇعالىم بيۋدجەتتىك نەسيە العان.
سونىمەن قاتار تاۋەلسىزدىك جىلدارىندا مۇنايلى اۋدانىندا 80 بالاباقشا اشىلدى. مۇنايلى اۋدانى قۇرىلعان 2007 جىلى مۇندا جالعىز مەملەكەتتىك بالاباقشا جۇمىس ىستەسە، قازىر 68 جەكە مەنشىك، 10 مەملەكەتتىك بالاباقشا بار. جىل وتكەن سايىن بالاباقشاداعى تاربيە جۇمىستارىنىڭ دا ساپاسى ارتىپ كەلەدى. كۇنى كەشە باياندى اۋىلىنىڭداعى «بوتاقان» بالاباقشاسىندا بالالاردىڭ ويلاۋ، سويلەۋ قابىلەتىن دامىتاتىن «مونتەسسوري» كابينەتى اشىلدى.
«بۇل يتاليالىق عالىم ماريا مانتەسسوريدىڭ تۇجىرىمداسىمەن دايىندالعان كابينەت. ءبىزدىڭ بالاباقشادا 140 بالا بولسا، سونىڭ ەكەۋى ەرەكشە ءبىلىمدى قاجەت ەتەدى. بىراق مۇندا كەز كەلگەن بالا كەلىپ، ۋاقىت وتكىزە الادى. 2 تاربيەشىنىڭ بىلىكتىلىگىن ارتتىرىپ، وسى كابينەتتە جۇمىس جۇرگىزۋگە ادەيى دايىندادىق»، - دەدى بالاباقشا مەڭگەرۋشىسى گۇلمايسا امانگەلدىقىزى.
ەگەمەندىك العان جىلدار ىشىندە مۇنايلىدا شاعىن كاسىپكەرلىك سۋبەكتىسى 88 پايىزعا ارتقان. سونىڭ نەگىزىندە 10 732 ادام جۇمىسپەن قامتىلعان. اۋدان كاسىپكەرلەرى جالپى نارىققا تەمىر بەتون پليتالارىن، قيىرشىق تاس جانە اسفالت، پەنوپلاستتان باستاپ، ءسۇت، ۇن، ەت جانە شۇقىن ونىمدەرىن، كوكونىستەر ۇسىنۋدا.
سونىڭ ءبىرى 2018 جىلى قۇرىلعان ماڭعىستاۋ اۋىلىنداعى «ايسار ستروي اقتاۋ» جشس. كومپانيا قۇرىلىسشىلارعا بەتون جانە گازابلوگ وندىرۋمەن اينالىسادى.
«ءبىز جىلىنا 20 مىڭ تەكشە مەتر بەتون جانە 5 مىڭ تەكشە مەتر گازابلوگ وندىرەمىز. كەلەر جىلدان باستاپ ءۇيدىڭ سىرتىن قاپتايتىن پليتالاردى دا شىعارۋدى جوسپارلاپ وتىرمىز. قازىر وڭىردەگى بىرقاتار ءىرى قۇرىلىس كومپانيالارىمەن بەرىك ارىپتەستىك قارىم قاتىناس ورناتتىق. 30 ادامدى جۇمىسپەن قامتىپ وتىرمىز. الداعى جىلى قىزمەتشىلەر سانىن ارتتىرۋدى ويلاپ وتىرمىز»، - دەدى ۋچاسكە باستىعى ەرجىگىت ءابدى.
