قازاقستاندا اۆتوساقتاندىرۋ قۇنى تومەندەۋى مۇمكىن. الايدا جەڭىلدىك تەك كەيبىر ايماقتارعا عانا قاتىستى. قارجى نارىعىن رەتتەۋ اگەنتتىگى ماجىلىسكە يكەمدى تاريفتەۋگە كوشۋدى ۇسىندى، دەپ حابارلايدى "ادىرنا" ۇلتتىق پورتالى "كتك" ارناسىنا سىلتەمە جاساپ.
“ەگەر سوڭعى بەس جىلدىڭ ستاتيستيكاسىن الىپ قارايتىن بولساق، ءار وڭىردە جول-كولىك اپاتتارىنىڭ سانى ءارتۇرلى. سولتۇستىك قازاقستان وبلىسىندا 20%، الماتىدا 58%، نۇر-سۇلتان قالاسىندا 61%. ەگەر وڭىردە اپات كورسەتكىشى از بولسا، وندا تاريف تومەن بولۋى شارت. ءبىز بۇل تەتىككە كوشسەك، قازاقستاننىڭ كوپتەگەن وبلىسىندا اۆتوساقتاندىرۋ قۇنى ارزاندايتىن ەدى. الماتى مەن نۇر-سۇلتاندا اپات كوپ بولعاندىقتان، تاريف قۇنى بۇرىنعىسىنشا قالادى”، – دەيدى قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا.
جول اپاتىنان اۋىر جاراقات الماعان كولىك جۇرگىزۋشىلەرىنىڭ دە ءومىرى جەڭىلدەي تۇسەدى. ساقتاندىرۋ اقشاسى جەڭىلدەتىلگەن ۇلگى بويىنشا قازىرگىدەي ەكى ايدىڭ ىشىندە ەمەس، بار بولعانى 5 كۇندە تولەنەدى.
جاڭا قىزمەت قازاقستاندىقتارعا 2023 جىلدان باستاپ قولجەتىمدى. اگەنتتىك وسى جاعدايدى دۇرىستايتىن ارنايى ءموبيلدى قوسىمشا ازىرلەۋگە دايىن. قوسىمشانىڭ كومەگىمەن تاراپتار ماسەلەنى پوليتسيا قىزمەتكەرىنسىز، ساقتاندىرۋ اگەنتىنسىز جانە ەڭ باستىسى، سوت تالقىلاۋىنسىز شەشە الادى.
جەڭىلدەتىلگەن قىزمەت ءۇش شارتپەن جۇمىس ىستەيدى. ەگەر جول اپاتىندا ەكى كولىك سوعىلىپ قالسا، سونىڭ سالدارىنان ەشكىمنىڭ دەنساۋلىعىنا زيان كەلمەسە، شىعىن كولەمى 100 ايلىق ەسەپتىك كورسەتكىشتەن اسپاۋى كەرەك.
