تسويدىڭ نە سەبەپتى قىزمەتتەن بوساتىلعانى بەلگىلى بولدى

20320
Adyrna.kz Telegram

قىزمەتىنەن بوساتىلعان بۇرىنعى دەنساۋلىق ساقتاۋ ءمينيسترى الەكسەي تسوي دەنساۋلىق ساقتاۋ سالاسىن عىلىم مەن الەۋمەتتىك باستامالار ارقىلى دامىتۋدى قولعا العانىن مالىمدەدى، دەپ حابارلايدى "ادىرنا" ۇلتتىق پورتالى.

- بۇگىن مەنىڭ ازاماتتىق سەكتورعا اۋىسۋ جانە عىلىم مەن الەۋمەتتىك باستامالار ارقىلى دەنساۋلىق ساقتاۋدى دامىتۋ تۋرالى شەشىمىم قولداۋ تاپتى، - دەپ جازدى تسوي الەۋمەتتىك جەلىدەگى پاراقشاسىندا.

ول مەملەكەت باسشىسى COVID-19 بويىنشا جاعدايدى تۇراقتاندىرۋدى، دەنساۋلىق ساقتاۋ جۇيەسىنىڭ الەۋەتىن ارتتىرۋدى تاپسىرعانىن ايتتى.

-ءبىز ەپيدەميولوگيالىق قاۋىپ-قاتەرگە قارسى تۇرۋ شارالارىن قابىلدادىق: ءار وڭىردە جاڭا ينفەكتسيالىق اۋرۋحانالار سالىندى، جەدەل جاردەم كولىگى پاركى، جاساندى تىنىس الۋ اپپاراتتارى، اۋىلداعى جىلجىمالى مەديتسينالىق كەشەندەر جاڭارتىلدى، وتاندىق فارماتسەۆتيكا ونەركاسىبى ءونىم شىعارۋ بويىنشا جوعارى كورسەتكىش كورسەتىپ كەلەدى، دارىلەر مەن مەديتسينالىق بۇيىمداردىڭ قاجەتتى قورى جاساقتالدى، سەس پەن زەرتحانا قىزمەتىنىڭ الەۋەتى ارتتى، QazVac ۆاكتسيناسى شىعارىلدى. از ۋاقىت ىشىندە دەنساۋلىق ساقتاۋ سالاسى نىعايدى، ءبىز جۇيەلى تۇردە مەديتسينا قىزمەتكەرلەرىنىڭ جالاقىسىن كوتەردىك، قىلمىستىق-اتقارۋ جۇيەسى كوميتەتى مەديتسينالىق قىزمەتىن دەنساۋلىق ساقتاۋ مينيسترلىگىنە وتكىزۋ تۋرالى جانە باسقا دا كوپتەگەن زاڭ جوباسىن ازىرلەدىك، - دەپ شولۋ جاسادى تسوي اتقارىلعان جۇمىستارعا.

سونداي-اق تسوي "دەنى ساۋ ۇلت" ۇلتتىق جوباسى بەكىتىلگەنىن، دۇنيەجۇزىلىك دەنساۋلىق ساقتاۋ ۇيىمى، يۋنيسەف جانە بۇۇ-نىڭ باسقا دا اگەنتتىگىمەن ءونىمدى ارىپتەستىك جولعا قويىلعانىن ايتىپ ءوتتى.

- ەل باسشىلىعىنا، پرەزيدەنت اكىمشىلىگىنە، پرەمەر-مينيسترگە، ۇكىمەتتەگى ارىپتەستەرىمە، دەنساۋلىق ساقتاۋ مينيسترلىگىنە، بارلىق جەرگىلىكتى اتقارۋشى ورگاندارعا، ازاماتتىق سەكتورعا، باق-قا، ەرىكتىلەرگە، ۇكىمەتتىك ەمەس ۇيىمدارعا جانە قىمباتتى مەديتسينا قىزمەتكەرلەرىنە سەنىم بىلدىرگەنى جانە قازاقستان حالقىنىڭ يگىلىگى ءۇشىن بىرلەسىپ اتقارعان وراسان زور جۇمىسى ءۇشىن العىسىمدى بىلدىرەمىن. جاقىن ارادا ەڭبەك جولىنىڭ جاڭا ۆەكتورىن انىقتايمىز. الدا جاڭا جوبالار كۇتىپ تۇر، - دەپ تۇيىندەدى تسوي.

ايتا كەتەيىك، 2021 جىلدىڭ 20 جەلتوقسانىندا مەملەكەت باسشىسى الەكسەي تسويدى دەنساۋلىق ساقتاۋ ءمينيسترى قىزمەتىنەن بوساتۋ تۋرالى جارلىققا قول قويدى.

"ادىرنا" ۇلتتىق پورتالى

پىكىرلەر