"ادىرنا" اقپاراتتىق اگەنتتىگىنىڭ ۇيىمداستىرۋىمەن 2021 جىلدىڭ ءار سالاداعى ۇزدىكتەرى الەۋمەتتىك جەلىدە ساۋالناما ارقىلى انىقتالدى. اتالعان ساۋالنامالاردىڭ ىشىندەگى ەڭ قىزىقتى، تارتىستى وتكەنى، بارىنشا كوپشىلىك قاۋىمدى قامتىعانى "جىلدىڭ ۇزدىك دەپۋتاتى" اتالىمى بولدى. ءبىر اپتا بويى جۇرگەن ساۋالناما ناتيجەسىندە قازىبەك يسا "2021 جىلدىڭ ۇزدىك دەپۋتاتى" اتالىمىن جەڭىپ الدى.
اتالعان ساۋالنامادا قازىبەك يسا مەن ەرلان سايروۆ ءوزارا تەڭ داۋىس جيناپ، جانكۇيەرلەرىنىڭ كوپتىگىمەن كوپشىلىكتى تاڭ قالدىردى. قورىتىندى شىعارۋعا ءبىر كۇن قالعاندا ەرلان سايروۆ ءبىرشاما داۋىسپەن الدا كەلە جاتقان قازىبەك يساعا جولىن بەرىپ، قۇرمەت كورسەتتى.ايتا كەتۋ كەرەك، قازىبەك يسا — قازاق ءتىلى ءۇشىن شىرىلداپ وتقا دا، سۋعا دا ءتۇسىپ، ەلدەگى بىرقاتار ماسەلەلەردى كوپشىلىككە جەتكىزىپ جۇرگەن ناعىز ازامات. "ادىرنا" اقپاراتتىق اگەنتتىگىنىڭ باس رەداكتورى ارمان اۋباكىر "جىلدىڭ ۇزدىك دەپۋتاتى" اتالىمىنا يە بولعان قازىبەك يساعا ماراپاتىن تابىستاپ، ەلدىڭ العىسىن جەتكىزدى. ەل اعاسىنا ماراپاتىڭىز قۇتتى بولسىن دەيمىز!
"ادىرنا" ۇلتتىق پورتالى
