سىبايلاس جەمقورلىققا قارسى ءىس-قيمىل اگەنتتىگى تەرگەۋ دەپارتامەنتى باسشىسىنىڭ ەكس-ورىنباسارى، بۇرىنعى ارنايى پروكۋرور ولەسيا كەكسەل ازاپتاۋ ءىسى بويىنشا كۇدىككە ءىلىندى. بۇل تۋرالى باس پروكۋراتۋرانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«2025 جىلعى 4 شىلدەدە باس پروكۋراتۋرا قىلمىستىق كودەكستىڭ 146-بابىنىڭ 2-بولىگىنىڭ 1-ءشى جانە 2-تارماقتارىنا سايكەس («ازاپتاۋ») كوزدەلگەن قىلمىستى جاسادى دەگەن كۇدىكپەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ تەرگەۋ دەپارتامەنتى باسشىسىنىڭ بۇرىنعى ورىنباسارى كەكسەل و.ي.-ءنى كۇدىكتى دەپ تانىدى»،—دەپ ءتۇسىندىردى قۇزىرلى ورگان.
قازىرگى تاڭدا تەرگەۋ امالدارى جۇرگىزىلىپ جاتىر.
ايتا كەتەيىك، ولەسيا كەكسەل ەكس-پرەمەر سەرىك احمەتوۆ پەن ەكس-مينيستر قۋاندىق بيشىمباەۆقا قاتىستى اتىشۋلى ىستەردى تەرگەگەن بولاتىن. ول 2019 جىلى دا ازاپتاۋ ءىسى بويىنشا كۇدىكتى رەتىندە تانىلعان. كاسىپكەردىڭ شاعىمى نەگىزىندە كەكسەل مەن باس پروكۋراتۋرانىڭ تەرگەۋ توبىنا كىرگەن باۋىرجان عابباسوۆقا قاتىستى سوتقا دەيىنگى تەرگەۋ باستالعان. ءوتىنىش بەرۋشى بۇل تۇلعالار تەرگەۋ بارىسىندا زاڭسىز تاسىلدەر قولداندى دەپ مالىمدەگەن. باستاپقىدا باس پروكۋراتۋرا، كەيىن سول كەزدەگى ىشكى ىستەر ءمينيسترى ەرلان تۇرعىمباەۆ كەكسەلگە بايلانىستى ءىس قىلمىس قۇرامى جوق بولعاندىقتان توقتالعانىن ايتقان ەدى.
