«جۇرۋدەن قالدى...» جىلانباەۆتىڭ ۇلى اكەسىنىڭ ءىسىن قايتا قاراۋدى سۇرادى

تانىمال مارافونشى مارات جىلانباەۆتىڭ ۇلى ءرۇستام جىلانباەۆ قازاقستاندىقتارعا ۇندەۋ جاسادى، دەپ حابارلايدى «ادىرنا» ءتىلشىسى.

ول اكەسىنىڭ كولونيادا وتە اۋىر جاعدايدا جاتقانىن جەتكىزدى.

«ەشكىمدى ولتىرمەدى، ۇرمادى، تونامادى. بىراق ونى 7 جىلعا سوتتادى. قازىر سالماعى 45 كەلى عانا، وزدىگىنەن جۇرە المايتىن كۇيدە. سوت ءىسىن قايتا قاراپ، جازاسىن جەڭىلدەتۋدى سۇرايمىن. ەڭ بولماسا، قالىپتى جاعداي جاسالسىن نەمەسە باسقا كولونياعا اۋىستىرىلسىن»، — دەدى ءرۇستام جىلانباەۆ.

بۇعان دەيىن قازاقستان ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى سوتتالعان سۋپەرمارافونشى مارات جىلانباەۆتىڭ دەنساۋلىعى قاناعاتتانارلىق جاعدايدا ەكەنى تۋرالى اقپارات تاراتتى.

ەسكە سالايىق، 2023 جىلى استانا سوتى ازاماتتىق بەلسەندى مارات جىلانباەۆتى 7 جىلعا سوتتاعان ەدى. وعان «تىيىم سالىنعان ۇيىمنىڭ قىزمەتىنە قاتىستى» جانە «ەكسترەميزمدى قارجىلاندىردى» دەگەن ايىپ تاعىلدى.

مارات جىلانباەۆ  — 1990 جىلدارى قاراقۇم، ساحارا، ۇلكەن ۆيكتوريا جانە نەۆادا سياقتى ەڭ ۇلكەن شولدەردى باسىپ وتكەن الەمدەگى جالعىز مارافونشى. گيننەستىڭ رەكوردتار كىتابىنا جەتى رەت ەنگەن.