قوبدا اۋدانىندا حالىقتىڭ دەنساۋلىعىن ساقتاۋ سالاسىندا تاعى ءبىر يگى قادام جاسالدى. جارىق جانە وتەك اۋىلدارىندا جاڭا مەديتسينالىق پۋنكتتەر پايدالانۋعا بەرىلدى.
اشىلۋ سالتاناتىنا وبلىس اكىمىنىڭ ورىنباسارى اسىلبەك ەسەنباەۆ، اۋدان اكىمى ىزگىلىك تىنىمگەرەەۆ، سونداي-اق وبلىستىق دەنساۋلىق ساقتاۋ، قۇرىلىس، ساۋلەت جانە قالا قۇرىلىسى باسقارمالارىنىڭ وكىلدەرى قاتىستى.
جارىق اۋىلىنداعى مەديتسينالىق پۋنكت مەملەكەت باسشىسىنىڭ اۋىلدىق ايماقتاردى دامىتۋ جانە مەديتسينالىق ينفراقۇرىلىمدى جاڭعىرتۋ جونىندەگى تاپسىرمالارىنىڭ اياسىندا سالىنسا، وتەك اۋىلىنداعى نىسان «اۋىل – ەل بەسىگى» باعدارلاماسى بويىنشا بوي كوتەردى.
قۇرىلىس جۇمىستارىن «رۋس تال» جانە «اقتوبە ادال قۇرىلىس» جاۋاپكەرشىلىگى شەكتەۋلى سەرىكتەستىكتەرى بەلگىلەنگەن مەرزىمدە ورىندادى.
«پرەزيدەنت قاسىم-جومارت كەمەلۇلى توقاەۆتىڭ باستاماسىمەن وڭىرلەردە مەديتسينالىق ينفراقۇرىلىم قارقىندى دامىپ كەلەدى. وبلىس كولەمىندە جاڭا دەنساۋلىق ساقتاۋ نىساندارى سالىنىپ، قولدانىسقا بەرىلۋدە. بيىلعى جىلى وبلىس بويىنشا 11 جاڭا مەديتسينالىق پۋنكتتىڭ قۇرىلىسى جۇرگىزىلۋدە. بۇل جۇمىستار اۋىل تۇرعىندارىنىڭ ساپالى مەديتسينالىق قىزمەتكە قولجەتىمدىلىگىن قامتاماسىز ەتۋگە باعىتتالعان»، – دەدى وبلىس اكىمىنىڭ ورىنباسارى اسىلبەك ەسەنباەۆ.
بۇگىنگى كۇنى قولدانىسقا بەرىلگەن زاماناۋي قۇرال-جابدىقتارمەن قامتاماسىز ەتىلگەن جاڭا مەديتسينالىق پۋنكتتەر وتەك جانە جارىق اۋىلدارىنىڭ 500-دەن استام تۇرعىنىنا العاشقى جانە شۇعىل مەديتسينالىق كومەكتى ساپالى تۇردە الۋعا مۇمكىندىك بەرەدى.
قازىرگى تاڭدا قوبدا اۋدانىندا 27 مەديتسينالىق مەكەمە حالىققا قىزمەت كورسەتۋدە. ونىڭ ىشىندە 1 اۋداندىق اۋرۋحانا، 6 دارىگەرلىك امبۋلاتوريا، 2 فەلدشەرلىك-اكۋشەرلىك پۋنكت جانە 18 مەديتسينالىق پۋنكت بار.
