قازاقستاندا سالىقتىق ەسەپتىلىكتى تاپسىرۋ مەرزىمىن بۇزعانى ءۇشىن قولدانىلاتىن ايىپپۇلدار الىنىپ تاستالادى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قارجى ۆيتسە-ءمينيسترى ەرجان ءبىرجانوۆ حابارلادى.
ونىڭ ايتۋىنشا، دەكلاراتسيا ۋاقىتىندا تاپسىرىلماعان جاعدايدا ول نولدىك كورسەتكىشتەرى بار ەسەپتىلىك رەتىندە قابىلدانادى. كەيىن سالىق تولەۋشى ەسەپتى كەزەڭدەگى ناقتى تابىسى تۋرالى دەرەكتەردى ءوزى قايتا ەنگىزە الادى.
ۆيتسە-مينيستر سونىمەن قاتار مۇلىك جانە جەر سالىعى بويىنشا اعىمداعى تولەمدەردى ەسەپتەۋ، ەگەر مىندەتتەمەلەر مولشەرى 1 ملن تەڭگەدەن اسپاسا، جۇرگىزىلمەيتىنىن مالىمدەدى. كولىك سالىعىنا قاتىستى ەسەپتەر مەن دەكلاراتسيالار دا ەندى تالاپ ەتىلمەيدى. بۇل سالىق جول پوليتسياسىنىڭ دەرەكتەرى نەگىزىندە اۆتوماتتى تۇردە ەسەپتەلەدى.
جاڭا نورمالارعا سايكەس سالىقتىق ەسەپتىلىكتىڭ سانى 41-دەن 28-گە دەيىن قىسقاردى. سونداي-اق سالىقتىق جەڭىلدىكتەر قولدانىلعان جاعدايدا تولتىرىلۋى ءتيىس مىندەتتى جولدار ەنگىزىلدى.
ۆەدومستۆو مالىمەتىنشە، بۇل وزگەرىستەر سالىق ورگاندارىنىڭ جۇمىس جۇكتەمەسىن ازايتادى. 2024 جىلى ەسەپتىلىكتى تاپسىرماعانى ءۇشىن 7,9 مىڭ سالىق تولەۋشى اكىمشىلىك جاۋاپكەرشىلىككە تارتىلعان.
