مەملەكەت باسشىسى قاسىم-جومارت توقاەۆ تۇركىمەنستان پرەزيدەنتى سەردار بەردىمۇحامەدوۆپەن كەزدەسۋ وتكىزدى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ سەردار بەردىمۇحامەدوۆ جانە باۋىرلاس تۇرىكمەن حالقىن ايتۋلى داتا – تۇركىمەنستاننىڭ تۇراقتى بەيتاراپتىعىنا 30 جىل تولۋىمەن قۇتتىقتادى.
مەملەكەت باسشىسى مەرەيلى ساتكە وراي ۇيىمداستىرىلعان حالىقارالىق فورۋمدا كوتەرىلەتىن ماسەلەلەردىڭ ماڭىزىن اتاپ ءوتتى.
«اشحاباد سەكىلدى كوركەم شاھارعا شاقىرعانىڭىز ءۇشىن ريزاشىلىعىمدى بىلدىرەمىن. مۇندا كەلگەن سايىن قوناقجاي پەيىلدەرىڭىزدى، تۋىستىق ءارى دوستىق كوڭىلدەرىڭىزدى سەزىنەمىز. ەرتەڭگى فورۋم وزىنە جۇكتەلگەن مىندەتتى تولىق اتقارىپ شىعاتىنىنا جانە حالىقارالىق قاتىناستار تاريحىندا ايتۋلى ۋاقيعا بولاتىنىنا سەنىمدىمىن. ويتكەنى بۇل جيىندا بەيبىتشىلىك، بەيتاراپتىلىق جانە سەنىم سەكىلدى ەڭ وزەكتى تاقىرىپتار قوزعالادى. قازىرگى الەمگە جەتپەي تۇرعانى دا وسى قۇندىلىقتار»،– دەدى قاسىم-جومارت توقاەۆ.
تاراپتار ەكىجاقتى قارىم-قاتىناستى دامىتۋ پەرسپەكتيۆاسىن تالقىلادى. سەردار بەردىمۇحامەدوۆتىڭ تاياۋدا استاناعا جاساعان مەملەكەتتىك ساپارى كەزىندە قول جەتكىزىلگەن ۋاعدالاستىقتاردى جۇزەگە اسىرۋ بارىسىنا ايرىقشا ءمان بەرىلدى. ءوز كەزەگىندە تۇركىمەنستان پرەزيدەنتى مەملەكەت باسشىسىمەن اشحاباد قالاسىندا جۇزدەسكەنىنە قۋانىشتى ەكەنىن جەتكىزدى.
«وسى حالىقارالىق دەڭگەيدەگى فورۋمعا قاتىسۋ ارقىلى ءسىز بەيبىتشىلىكتى، سەنىم مەن ءوزارا تۇسىنىستىكتى نىعايتۋعا بەيىل ەكەنىڭىزدى كورسەتىپ وتىرسىز. حالىقارالىق بەيبىتشىلىك جانە سەنىم فورۋمىنا شاقىرۋىمدى قابىل العانىڭىز ءۇشىن العىس ايتامىن. وزىڭىزبەن تۇرىكمەن جەرىندە كەزدەسۋ ءبىز ءۇشىن زور مارتەبە»،- دەدى سەردار بەردىمۇحامەدوۆ.
مەملەكەتتەر باسشىلارى ءوزارا ساۋدا كولەمىن ارتتىرۋ، ەكونوميكالىق بايلانىستاردى كۇشەيتۋ، ەنەرگەتيكا، كولىك-لوگيستيكا جانە اۋىل شارۋاشىلىعى سالالارىندا بىرلەسكەن جوبالاردى جۇزەگە اسىرۋ ماسەلەلەرىن قاراستىردى.
بۇدان الدىن تۇركىمەنستان بەيتاراپتىعىنىڭ 30 جىلدىعىنا ارنالعان حالىقارالىق شولۋعا بارعان قازاقستان پرەزيدەنتى قاسىم-جومارت توقاەۆتى اۋەجايدا تۇركىمەنستان حالىق ءماسلاحاتى القاسىنىڭ باسشىسى، ەكس-پرەزيدەنت قۇربانعۇلى بەردىمۇحاممەدوۆ قارسى الىپ، اۋەجايدا ەكەۋارا ەلدەر قاتىناسى تۋرالى پىكىر الماسقان بولاتىن.
