قازاقستان جاپونياعا جىلقى ەتىن ەكسپورتتاۋعا دايىندالىپ جاتىر، دەپ حابارلايدى "ادىرنا" ۇلتتىق پورتالى.
قاراعاندى وبلىستىق «قازاقستان فەرمەرلەر وداعى» رقب فيليالىنىڭ توراعاسى يگور جابياك جاپونياعا جىلقى ەتىن جەتكىزۋگە دايىندىق بارىسى تۋرالى ايتتى.
جاپونيا استاناسى توكيودا وتكەن سامميت اياسىندا Ulysmedia تىلشىسىنە سۇحبات بەرگەن يگور جابياك بۇل باعىتتاعى كەلىسسوزدەر سوڭعى بەس جىل بويى جۇرگىزىلىپ كەلە جاتقانىن جەتكىزدى. ونىڭ ايتۋىنشا، پاندەميا كەزەڭىندە جۇمىستار ۋاقىتشا توقتاعانىمەن، بيىل جاپون تاراپى قازاقستانعا ارنايى كەلىپ، ءوز تالاپتارى مەن ۇسىنىستارىن تانىستىرعان.
فەرمەردىڭ سوزىنشە، جاپونيا ازىق-تۇلىك قاۋىپسىزدىگىنە اسا جوعارى تالاپ قويادى. وسىعان بايلانىستى قازاقستاندىق تاراپ بارلىق ستاندارتتارعا ساي بولۋ ءۇشىن بىرقاتار شارا قابىلداعان.
"جاپوندار تالاپتىڭ ءبارىن ەگجەي-تەگجەيلى تەكسەرەدى. سول سەبەپتى ءبىز ءوز زەرتحانامىزدى اشىپ، اككرەديتاتسيادان وتتىك. بۇل – جاپونياعا جىلقى ەتىن يمپورتتاۋشىلار تىزىمىنە ەنۋ ءۇشىن قاجەت قادام. قازىر بۇل كەلىسىمنىڭ جۇزەگە اسۋىنا ءبىر تابان قالدى دەپ ويلايمىن. ەڭ باستىسى – ۇكىمەتارالىق دەڭگەيدە جەتكىزۋ مەن ىنتىماقتاستىق تۋرالى حاتتاماعا قول قويىلسا دەيمىز", — دەدى يگور جابياك.
جوباعا قازاقستاننىڭ اۋىل شارۋاشىلىعى مينيسترلىگى، ساۋدا جانە ينتەگراتسيا مينيسترلىگى، سونداي-اق «Kazakh Invest» ۇلتتىق كومپانياسى قولداۋ كورسەتىپ وتىر. جابياكتىڭ ايتۋىنشا، جاپون نارىعى قازاقستاندىق جىلقى ەتىنە جوعارى قىزىعۋشىلىق تانىتقان.
جوسپار بويىنشا، ەكسپورت قاراعاندى وبلىسى اباي اۋدانىنان جۇزەگە اسادى. قازىرگى تاڭدا بۇل وڭىردە شامامەن 3 مىڭعا جۋىق جىلقى بار. ال جاپونيا اي سايىن 100 باس، ياعني جىلىنا شامامەن 1 000 جىلقى ەتىن ساتىپ الۋعا دايىن.
