قازاقستان پرەزيدەنتى ۇلىبريتانيانىڭ بيزنەس جانە ساۋدا ىستەرى بويىنشا مەملەكەتتىك ءمينيسترى نۋسرات عانيدى قابىلدادى، دەپ حابارلايدى «ادىرنا» ۇلتتىق پورتالى.
ەل پرەزيدەنتى قاسىم-جومارت توقاەۆ ۇلىبريتانيانىڭ مەملەكەتتىك ءمينيسترى نۋسرات عانيمەن كەزدەسىپ، ۇلىبريتانيا قازاقستاننىڭ نەگىزگى ساۋدا سەرىكتەسىنىڭ ءبىرى جانە ەل ەكونوميكاسىنا ينۆەستيتسيا سالۋ كورسەتكىشى بويىنشا جەتىنشى ينۆەستور ەكەنىن جەتكىزدى.
مەملەكەت باسشىسىنىڭ ايتۋىنشا، قازاقستاندا 550-دەن استام بريتاندىق كاسىپورىن، ولاردىڭ اراسىندا Shell جانە Ernst & Young سياقتى جەتەكشى كومپانيالار بار.
ال ەكى ەل اراسىنداعى تاۋار اينالىمى بىلتىرعى جىلى 60%-عا ارتىپ، 1,8 ميلليارد دوللاردى قۇراعان.
ءبىز لوندونمەن ساۋدا جانە ينۆەستيتسيا سالالارىنداعى بايلانىستارىمىزدى كەڭەيتۋگە مۇددەلىمىز. بريتاندىق تاراپتىڭ دا قازاقستانمەن جان-جاقتى ىنتىماقتاستىقتى دامىتۋعا نيەت تانىتىپ وتىرعانىن ەرەكشە اتاپ وتكىم كەلەدى، – دەدى پرەزيدەنت.ءوز كەزەگىندە نۋسرات عاني قۇرمەت كورسەتكەنى ءۇشىن قاسىم-جومارت توقاەۆقا جانە قازاقستان حالقىنا ريزاشىلىعىن ءبىلدىرىپ، ۇلىبريتانيا تاراپى ەكىجاقتى بايلانىستاردى دامىتۋعا باسا ءمان بەرەتىنىن اتاپ ءوتتى.
«ادىرنا» ۇلتتىق پورتالى
ۇقساس جاڭالىقتار
