فۋتبولدان قازاقستان قۇراماسىنىڭ كاپيتانى اسحات تاعىبەرگەن ۇلتتىق قۇراما ساپىنداعى مانسابىن اياقتادى. بۇل تۋرالى ءباسپاسوز ءماسليحاتىندا كوماندانىڭ باس باپكەرى ءالي اليەۆ ايتتى، دەپ حابارلايدى «ادىرنا» ءتىلشىسى.
«كوماندانىڭ جاڭارۋى — باياۋ پروتسەسس. بۇنداي ۇدەرىستەر كوماندا ىشىندە ءجۇرىپ جاتىر. ونىڭ ءبىرى - كاپيتانىمىز، ۇلكەن قۇرمەتكە يە اسحات تاعىبەرگەن باتىل شەشىمگە كەلىپ وتىر. ۇلتتىق قۇرامامەن قوشتاسۋ وتە قيىن. اسحات بۇل ءسوزدى كيىم اۋىستىراتىن بولمەدە ايتىپ، جاستارعا جول بەرىپ، ولارعا ۇلگى كورسەتتى. ءبىز ونىڭ سوڭعى ماتچىن جەڭىسپەن اياقتاي المادىق. ۇلتتىق قۇراما فۋتبولكاسىمەن كيىم اۋىستىراتىن بولمەدە قوش ايتىستى»،—دەدى ول.
تاعىبەرگەن 2014 جىلى قۇراما ساپىندا دەبيۋت جاساپ، 2021 جىلى كاپيتان اتانعان ەدى. وسى ۋاقىت ارالىعىندا ول 63 ماتچ وتكىزىپ، 3 گول سوعىپ، 7 ناتيجەلى پاس بەرگەن.
ايتا كەتەيىك، 9 ماۋسىمدا قازاقستان ۇلتتىق قۇراماسى 2026 جىلعى الەم چەمپيوناتىنىڭ ىرىكتەۋ كەزەڭىندەگى ماتچتا سولتۇستىك ماكەدونيادان 0:1 ەسەبىمەن جەڭىلىپ قالدى. J توبىنداعى كەزدەسۋ ەلورداداعى «استانا ارەنا» ستاديونىندا ءوتتى.
