ۇندىستانداعى اۋە اپاتىنان امان قالعان جالعىز جولاۋشى وقيعانى باياندادى

583
Adyrna.kz Telegram
https://adyrna.kz/content/uploads/2025/06/image-57-960x500.jpg?token=325471fa98c0f489bd3190a08883ec39

ءۇندىستاننىڭ احمەداباد قالاسىنداعى اۋە اپاتىنان امان قالعان جالعىز جولاۋشى باسىنان وتكەنىن باياندادى، دەپ حابارلايدى "ادىرنا" ۇلتتىق پورتالى Hindustan Times باسىلىمىنا سىلتەمە جاساپ.

Air India اۋە كومپانياسىنىڭ احمەداباد–لوندون باعىتى بويىنشا ۇشىپ شىققان ۇشاعى اپاتقا ۇشىراپ، بورتتاعى 242 ادامنىڭ بارلىعى دەرلىك قازا تاپقان ەدى. تەك ۇلىبريتانيا ازاماتى ۆيشۆاش كۋمار رامەش امان قالعان.

جەرگىلىكتى پوليتسيا مالىمەتىنشە، رامەش ۇشاقتاعى 11A ورنىندا وتىرعان. ول اپاتتان كەيىن وتباسىنا حابارلاسىپ، ءتىرى ەكەنىن راستاعان.

«ۇشاق كوتەرىلە باستاعاندا العاشقى 5-10 سەكۋند ىشىندە اۋەدە قاتىپ قالعانداي سەزىلدى. كەنەت شامدار جىپىلىقتاپ، ۇشاق ءبىر عيماراتقا سوعىلدى. مەن ءالى كۇنگە دەيىن ءتىرى قالعانىما سەنە المايمىن. ءبىر ساتكە مەن دە ولەمىن دەپ ويلادىم. قالاي امان قالعانىمدى بىلمەيمىن. كوز الدىمدا ادامدار كوز جۇمىپ جاتتى. قاتتى قورىقتىم، ورنىمنان تۇرىپ، جۇگىرە جونەلدىم. اينالامدا ۇشاقتىڭ سىنىقتارى جاتتى. بىرەۋ مەنى ۇستاپ الىپ، جەدەل جاردەم كولىگىنە وتىرعىزىپ، اۋرۋحاناعا جەتكىزدى»، - دەدى رامەش.

الەۋمەتتىك جەلىلەردە تاراعان فوتوسۋرەتتەردەن قانعا بويالعان، بىراق ءتىرى قالعان ەر ادامنىڭ قالىڭ ءتۇتىن اراسىنان جەدەل جاردەم كولىگىنە قاراي ءوزى كەلە جاتقانىن كورۋگە بولادى.

مەديا مالىمەتىنشە، ۆيشۆاش كۋمار ءۇندىستاندا تۋعانىمەن، ۇزاق جىلداردان بەرى ۇلىبريتانيادا تۇرادى، ۇيلەنگەن، بالاسى بار. اپاتتان كەيىن ول ەڭ الدىمەن ايەلى مەن بالاسىنا حابارلاسقان.

الايدا رامەشتىڭ وتباسى ءالى دە الاڭداۋلى. ونىڭ اعاسى ادجاي دە وسى رەيستە بولعان، بىراق ونىڭ تاعدىرى ءالى بەلگىسىز. تۋىستارى ىزدەۋىن جالعاستىرىپ جاتىر.

پىكىرلەر