قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىعىنا سايكەس قر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ تۇركى اكادەمياسىنىڭ ۆيتسە-پرەزيدەنتى فۋزۋلي ماجيدليگە ءىى دارەجەلى «دوستىق» وردەنىن تابىستادى.
«دوستىق» وردەنى مەملەكەتتىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى، بەلسەندى قوعامدىق قىزمەتى، سونداي-اق، حالىقتار اراسىنداعى بەيبىتشىلىكتى، دوستىقتى جانە ىنتىماقتاستىقتى نىعايتۋعا سىڭىرگەن ەڭبەگى ءۇشىن بەرىلەدى.
تۇركى اكادەمياسى 2010 جىلعى 25 مامىردا قازاقستاننىڭ باستاماسىمەن قۇرىلىپ، قازىرگى ۋاقىتتا تۇركولوگيانىڭ حالىقارالىق تانىلعان عىلىمي ورتالىعى بولىپ تابىلادى. اكادەميانىڭ مۇشە ەلدەرى ازەربايجان، قازاقستان، قىرعىزستان جانە تۇركيا. ماجارستان بايقاۋشى مارتەبەسىنە يە. حالىقارالىق ۇيىمنىڭ شتاب-پاتەرى نۇر-سۇلتان قالاسىندا ورنالاسقان.
