پرەزيدەنت قاسىم-جومارت توقاەۆ استانا حالىقارالىق فورۋمىندا قازاقستاننىڭ سۋپەرپرەزيدەنتتىك جۇيەدەن باس تارتقانىن ەسكە سالىپ، پرەزيدەنتتىك بيلىكتى لايىقتى مودەل دەپ اتادى، دەپ حابارلايدى «ادىرنا» ءتىلشىسى.
«ءبىز سۋپەرپرەزيدەنتتىك جۇيەدەن باس تارتتىق. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىن باسشىلىققا الاتىن، تەجەۋ مەن تەپە-تەڭدىك جۇيەسى بار پرەزيدەنتتىك رەسپۋبليكا جولىن تاڭدادىق. بۇل تۇجىرىم قازاقستانداعى ساياسي جۇيەنىڭ ەرەكشەلىكتەرىنە مەيلىنشە لايىقتى مودەل ەكەنىنە كامىل سەنەمىن»،—دەدى ول.
مەملەكەت باسشىسى پرەزيدەنت وكىلەتتىلىگى ءبىر رەتتىك 7 جىلدىق مەرزىممەن شەكتەلگەنىن دە اتاپ ءوتتى.
«قازاقستاندا عانا ەمەس، ءبىزدىڭ ايماقتا مۇنداي شەشىم بۇرىن-سوڭدى قابىلدانباعان. مەنىڭ ويىمشا، بۇل قادام ەلىمىزدىڭ ساياسي جۇيەسىن نىعايتۋعا، ەكونوميكاسىن دامىتۋعا جانە وركەنيەتتى قوعام قۇرۋعا نەگىز بولادى. پرەزيدەنت – حالىقتىڭ بەلگىلى ءبىر مەرزىمگە، ءبىزدىڭ جاعدايىمىزدا جەتى جىلعا جالداعان مەنەدجەرى»،—دەپ تولىقتىردى توقاەۆ.
كەشە اقوردادا مەملەكەت باسشىسى قاسىم-جومارت توقاەۆ گەرمانيا فەدەراتيۆتىك رەسپۋبليكاسى بۋندەسراتىنىڭ پرەزيدەنتى، ساار فەدەرالدى جەرىنىڭ پرەمەر-ءمينيسترى انكە رەلينگەرمەن كەزدەسكەندە دە قازاقستاندا پرەزيدەنتتىك باسقارۋ جۇيەسى ساقتالاتىنىن ايتقان. سوندا سوڭعى جىلدارى ەلدە اۋقىمدى ساياسي رەفورمالار جۇرگىزىلگەنىن اتاپ وتكەن توقاەۆ قۇقىق قورعاۋ جانە سوت جۇيەسىنە دە وزگەرىستەر ەنگىزىلۋى مۇمكىن ەكەنىن اتاپ وتكەن. دەگەنمەن پرەزيدەنتتىك باسقارۋ جۇيەسى ساقتالادى دەگەن.
