Prezident Qasym-Jomart Toqaev Astana halyqaralyq forumynda Qazaqstannyŋ superprezidenttık jüieden bas tartqanyn eske salyp, prezidenttık bilıktı laiyqty model dep atady, dep habarlaidy «Adyrna» tılşısı.
«Bız superprezidenttık jüieden bas tarttyq. «Küştı Prezident – yqpaldy Parlament – esep beretın Ükımet» qaǧidasyn basşylyqqa alatyn, tejeu men tepe-teŋdık jüiesı bar prezidenttık respublika jolyn taŋdadyq. Būl tūjyrym Qazaqstandaǧy saiasi jüienıŋ erekşelıkterıne meilınşe laiyqty model ekenıne kämıl senemın»,—dedı ol.
Memleket basşysy prezident ökılettılıgı bır rettık 7 jyldyq merzımmen şektelgenın de atap öttı.
«Qazaqstanda ǧana emes, bızdıŋ aimaqta mūndai şeşım būryn-soŋdy qabyldanbaǧan. Menıŋ oiymşa, būl qadam elımızdıŋ saiasi jüiesın nyǧaituǧa, ekonomikasyn damytuǧa jäne örkeniettı qoǧam qūruǧa negız bolady. Prezident – halyqtyŋ belgılı bır merzımge, bızdıŋ jaǧdaiymyzda jetı jylǧa jaldaǧan menedjerı»,—dep tolyqtyrdy Toqaev.
Keşe Aqordada Memleket basşysy Qasym-Jomart Toqaev Germaniia Federativtık Respublikasy Bundesratynyŋ Prezidentı, Saar federaldy jerınıŋ Premer-ministrı Anke Relingermen kezdeskende de Qazaqstanda prezidenttık basqaru jüiesı saqtalatynyn aitqan. Sonda soŋǧy jyldary elde auqymdy saiasi reformalar jürgızılgenın atap ötken Toqaev qūqyq qorǧau jäne sot jüiesıne de özgerıster engızıluı mümkın ekenın atap ötken. Degenmen prezidenttık basqaru jüiesı saqtalady degen.
