قازاقستاندا رەسەي اسكەري-تاريحي قوعامىنىڭ قۇرىلىمدارى مەن وكىلەتتىكتەرى جوق. بۇل تۋرالى «ەۋرازيالىق مونيتورينگ» ساراپتامالىق زەرتتەۋلەر ورتالىعىنىڭ ديرەكتورى، راتق-تىڭ قازاقستانداعى وكىلى الىبەك تاجىباەۆ مالىمدەدى، دەپ حابارلايدى «ادىرنا» ءتىلشىسى.
ول قازىرگى تاڭدا الەۋمەتتىك جەلىدە جالعان اقپارات تاراپ جۇرگەنىن اتاپ ءوتتى.
«مەنىڭ باستى مىندەتىم — قازاق حالقىنىڭ ۇلى وتان سوعىسىنداعى ەرلىكتەرى تۋرالى اقپاراتتى حالىقارالىق دەڭگەيگە شىعارۋ، جاڭا مۇراعاتتىق ماتەريالداردى انىقتاۋ، ۇمىت قالعان باتىرلاردىڭ ەسىمدەرىن قالپىنا كەلتىرۋ جانە بۇل دەرەكتەردى عىلىمي جانە كاسىبي دەڭگەيدە جاريا ەتۋ. بۇل — تەك تاريحي-مادەني ميسسيا، ونىڭ ەشقانداي ساياسي استارى جوق»، — دەدى ول.
سونداي-اق تاجىباەۆ رەسەيدىڭ اسكەري-تاريحي قوعامىنىڭ وكىلدىگىمەن ىنتىماقتاستىق جاساۋ وتەۋسىز نەگىزدە جۇزەگە اسىرىلاتىنىن مالىمدەدى. سوزىنشە، بۇل بىرقاتار ەلدە قولدانىلاتىن رەسمي قوعامدىق وكىلدەر مودەلىنە نەگىزدەلگەن.
رەسمي وكىل كوپشىلىكتى اقپاراتتى وبەكتيۆتى قابىلداۋعا شاقىرىپ، اقپاراتتىق مانيپۋلياتسيالارعا قاتىسۋدان ساق بولۋعا ۇندەدى.
بۇعان دەيىن ءماجىلىس دەپۋتاتى ەرمۇرات باپي ەلىمىزدە رەسەيدىڭ اسكەري-تاريحي مۋزەيىنىڭ فيليالىنىڭ اشىلۋى توڭىرەگىندەگى جاعدايدى سىنعا الىپ، قازاقستاندا ۇلتتىق قارۋ-جاراق مۋزەيىن اشۋدى ۇسىنعان بولاتىن.
