Белгілі заңгер әрі Қазақстан Республикасының Парламент сайлауына үміткер Абзал Құспан БҚО тұрғындарына су тасқыны салдарынан келген зардаптарымен күресетінін айтып, бейнеүндеу жолдады, деп хабарлайды “Адырна” ұлттық порталы.
“Кеше менің штабым су тасқыны оқиғаларына орай, белсенді сайлауалды насихатты тоқтату туралы шешім қабылдаған болатын ол туралы бейнеүндеуімде жарияладым.
Проблема өткен аптада басталған болатын, бірақ ол кезде маған сала мамандары енді бір күннен соң су кері қайтып, мәселе тұрақтанады деп сендірген еді. Алайда соңғы екі күнде жағдай қайтадан күрделенді, нәтижесінде облыс бойынша 4 ауданда төтенше жағдай жарияланды. Бұндай кезде сайлау деп елдің мазасын алған дұрыс болмас.
Қазіргі басты мәселе – су апатына ұшыраған азаматтарға жан-жақты қолдау көрсету, сондай-ақ осындай апаттардың туындау себептерін зерделеу және алдағы уақытта олардың алдын алуды ойластыру қажет.
Ертеңдері соңғы екі күнгі жұмысымыздың нәтижесін көретін боласыздар”,- деп жазды ол Facebook парақшасында.
